منتديات يزيد التعليمية

منتديات يزيد التعليمية (https://www.yzeeed.com/vb/index.php)
-   المسارات التحضيرية (https://www.yzeeed.com/vb/forumdisplay.php?f=122)
-   -   كيف قدرت أحصل على معدل عالي في السنة التحضيرية/علمي جامعة الملك عبدالعزيز؟ (https://www.yzeeed.com/vb/showthread.php?t=330270)

shewawa 09-02-2017 10:49 AM

كيف قدرت أحصل على معدل عالي في السنة التحضيرية/علمي جامعة الملك عبدالعزيز؟
 
تجربتي في السنة التحضيرية/علمي وكيف قدرت أحصل على معدل عالي؟

حابة أقول كلمة قبل لا أحكي عن تجربتي
الطرق اللي أنا أتبعتها في المذاكرة ماهي الطرق الوحيدة اللي راح تضمن لكم تجيبوا درجات كويسة أو معدل كامل، ولا طرق غيري، وتجربتي ماهي شرع منزّل راح يوصلكم لهدفكم، راح يكون في اختلاف في أساليبنا في المذاكرة والمصادر اللي نذاكر منها والأستاذات اللي نفهم منهم وأشياء كثير غيرها، بس أنا راح أشارككم ياها عشان متأكدة إنها حتفيدكم في بعض الأجزاء وراح تنبهكم لأشياء ما يذكروها في الملتقى التعريفي بداية السنة.
اش اللي شجعني أشارك تجربتي؟

أنا طالبة ما كان حولي أي أحد مهتم بدرجاته أو بإنه يجيب معدل عالي ويدخل تخصص هو يبغاه فما كنت أقدر أسأل وأستفيد ولا كان عندي أحد يوجهني، كنت أقرأ تجارب طلاب كاتبينها سواء في القدرات أو التحضيري أو غيره، هل فادتني؟
إيوا فادتني، الحمدلله قدرت أجيب معدل 5 ونسبتي الموزونة 99,58 وحتى في القدرات جبت درجة مرتفعة والفضل بعد الله لواحد كان كاتب تجربته بالتفصيل فشجعني وخلاني أتجاهل كلام البنات السلبي وتخوفهم المبالغ فيه.


السنة التحضيرية سنة انتقالية أكيد راح تواجهوا فيها صعوبات مفروض ما ننكر إنها موجودة، بالعكس لازم نوعيكم بيها عشان تعرفوا كيف تواجهوها وتستعدوا لها.

اش هيا السنة التحضيرية للقسم العلمي؟

هيا سنة تأسيسية نتيجتكم فيها راح تحدد أي تخصص حتنقبلوا فيه بعد ما تنجحوا وتعدوا موادها، راح تدرسوا فيها المواد العلمية الأساسية:
كيمياء، فيزياء، أحياء، رياضيات، إحصاء.
بالإضافة للحاسب ومهارات الاتصال.
كل هذه المواد تنحسب في المعدل بثلاث ساعات.
نظام الدراسة:
المواد راح تنقسم على الترمين، والمواد اللي حتدرسوها في الترم الواحد تعتمد على خطتكم.
الخطط:
خطة أ
الترم الأول: رياضيات، فيزياء، مهارات اتصال، حاسب.
الترم الثاني: كيمياء، إحصاء، أحياء.

خطة ب
الترم الأول: كيمياء، إحصاء، أحياء.
الترم الثاني: فيزياء، رياضيات، حاسب، مهارات اتصال.

نظام دراسة اللغة الإنجليزية:
تنقسم المستويات لأربعة، مستواكم يعتمد على درجتكم في الاختبار اللي يحددولكم موعده قبل بداية الدراسة.
كل مستوى ياخد 7/8 أسابيع يعني قرابة الشهرين *نص ترم*.
المستوى الأول: ما ينحسب في المعدل بس لازم تجيبوا فيه درجة النجاح 60+ عشان تعدوه، وتطلعوا للمستوى الثاني.
المستوى الثاني والثالث والرابع: ينحسبوا في المعدل بساعتين، وما تقدروا تروحوا للمستوى الأعلى إلا بعد ما تنجحوا في المستوى اللي إنو فيه. *يعني تجيبوا 60+*.

عدد ساعات كلاسات الإنجليزي أربع ساعات يوميًا.

معادلة الإنجليزي:
معادلة الإنجليزي يعني تختبروا اختبار انجليزي *الآيلتس أو التوفل* وتحققوا شرط الجامعة وهوا إنكم تجيبوا في الآيلتس 4.5 وما فوق أو في التوفل 57 وما فوق.
لو جبتوها اش تسوو وفي ايش تفيدكم؟
تروحوا في الجامعة لمركز اللغة الإنجليزية وتعطوهم الشهادة الأصلية وبعدها يلغو الإنجليزي من جدولكم وما ينحسب في معدلكم.

كدا خلصنا من تعريف السنة التحضيرية وننتقل للتفصيل في تجربتي:



مين أنا؟
أنا طالبة اسمي زينة درست تحضيري قبل ثلاث سنوات *دفعة 14* كنت مقدمة لتخصص وما انقبلت فيه لفرق بسيط في المعدل وسحبت من الجامعة وانشغلت في سنتين باستغلال فرص ثانية وما كان ليا فيها نصيب ورجعت قدمت لجامعة الملك عبد العزيز مع دفعة 17 والحمدلله جاني القبول وحاولت ما أكرر أخطائي وإهمالي في تجربتي الأولى.

مقدمة
بما إن تجربتي الثانية هيا الناجحة راح أدخل في تفاصيلها وأتجاهل الأولى، خطتي كانت ب وعادلت الإنجليزي بالآيلتس فكان عندي ثلاث كلاسات كيمياء، إحصاء، أحياء.
راح أتطرق لهم مادة مادة بكل شيء أعرفه عنهم من عدة نواحي:
المحتوى وتوزيع الدرجات وأفضل مصادر ذاكرت منها وأكثر أسلوب مذاكرة ناسبني وأخيرًا أفضل الأستاذات اللّي مرو عليا.



كيمياء:
شامل لكل اللي أخذناه في سنوات الثانوي. هوا صح أكثر اختصارا من الثانوي بس فيه أغلب المواضيع وفصوله كثير وأفكاره متنوعة.
توزيع الدرجات: 30 الدوري الأول، 30 الدوري الثاني، 40 النهائي.
وكان فيه بونس *راح أشرح معناها في الأخير*.

المصادر اللي ذاكرت منها: عن نفسي ذاكرت من سلايدات *ملازم* ليلى الحربي، سهلة وواضحة وفي أسئلة في النهاية ينقالها بنك الأسئلة *test bank* لازم تحلوها لأنو في الجامعة مذاكرة لحالها بدون تطبيق ما تنفع.

أفضل الأستاذات: أنا درستني أستاذة اسمها زينب، صراحة ما كانت مرة كويسة بس أنا الحمدلله كنت متأسسة كويسة في الكيمياء فاللي متأسسين كويس راح تناسبهم وكمان اللي ما ينحرجو يسألو عن كل شي، لأنو هيا شكلها فاهمة بس عندها مشكلة بعض المرات في إيصال المعلومة، وفي تجربتي الأولى درستني أستاذة ممتازة اسمها *ابتسام الصبان* أستاذة ابتسام تسوي اختبارات بسيطة عشان تجبركم تحفظو ودا شي مرة تحتاجوه في الجامعة.

الطريقة اللي اتبعتها في المذاكرة: كنت أذاكر أول بأول وأحيانًا أذاكر قبل الاختبار بكم يوم وكلها مشيت معايا، طالما أنا فاهمة وعندي وقت يكفي أحل الأسئلة فأنا وضعي سليم.
أحياء:
الأحياء مادة سهلة وتعرفوه دايمًا يحتاج حفظ. للي يقدرو يفهموه ويحفظوه ويذاكروه أول بأول راح يكون سهل وال100 فيه مضمونة. عيبه كميته كثيرة وما ينفع يتراكم إلين قبل الاختبار. ميزته إن اللي اختبرتوه ما ترجعو تختبروه مرة ثانية.

توزيع الدرجات: الدوري الأول33، الدوري الثاني 33، النهائي 44.
يعني الدرجة النهائية من 110 واللي تجيب من 110-100 تعتبر جايبة 100 وأي درجات زيادة تاخديها من أي اختبار فيهم تجمعيهم ويطلعو معاكي للنهائي وتستفيدي منهم.

المصادر اللي ذاكرت منها:
سلايدات الجامعة وراح يدلوكم عليها البنات والأستاذات، ذاكروها بذمة وضمير وفهم وراح تشوفوا الاختبار سهل مرة.
قبل الاختبار الأستاذات ينزلوا لكم أسئلة في البلاك بورد *راح أتكلم عنه بعدين* ومرة مفيدة ويجي منها في الاختبار.

أفضل الأستاذات:
الأحياء مادة لو ما جاتك فيها أستاذة كويسة تقدري تمشي حالك، بس يفضل إنك تكوني عند وحدة ممتازة عشان تشرحلك معاني الكلمات الإنجليزية الجديدة وعشانه دسم ويحتاج حفظ تحتاجي وحدة تخففه وتدخله لدماغك. أستاذتي كانت حنان الشاذلي وهيا أستاذة رائعة جدًا ماشاءالله تحبب الوحدة في المادة وتخليكي غصب تحفظي لأنها تسأل في بداية كل كلاس، فاللي عليكِ إنك تركزي معاها في الكلاس وتراجعي لو قراءة بتركيز بعد الكلاس0

طرق المذاكرة:
أولاً: المصطلحات الإنجليزية الجديدة عليكم سواءً في الأحياء أو في أي مادة اكتبوها في ورقة واكتبوا معناها واحفظوها. لو راكمتوها راح تستصعبوا المذاكرة وراح تأخذ منكم وقت وجهد.
فرق كبير بين الكمية اللي كنت أخلصها بسهولة في المرة الأولى والمرة الثانية لأنو لغتي الإنجليزية واستيعابي للكلمات أتحسن مرة فما صرت أستصعب المادة.

ثانيًا: قدر الإمكان ذاكروه أول بأول، أحيانًا كنت أفوت فصل واحد أو أكثر يصير وقت المذاكرة أبدأ فيه وبعدين أرجع للي مذاكرتهم.

ثالثًا: اللي ناويين يدخلوا تخصصات صحية حاولوا تفهموه كويس وتتذكروه لأنه فيه أساسيات للي راح تدرسوه، أستاذة حنان كانت تقول يحتاج تذاكروه ثلاث مرات عشان يرسخ في بالكم.

*وإنتو تذاكروا كل نقطة شوفوا هل هيَ مهمة؟ اش السؤال اللي ممكن يجي على هذه الفقرة واكتبوه. وامشوا في مذاكرتكم على هذه الطريقة وراح تحسوه واضح.
وغالبًا الأسئلة ما راح تخرج عن اللي حطيتوها، ميزته إنه مادة مباشرة ما في مجال للخدع فيها.

إحصاء:
الإحصاء مادة جديدة ما درسنا فيها في الثانوي إلا الاحتمالات، معلومات جديدة ومصطلحات جديدة فيها فهم وحفظ، تحتاج استيعاب وتفتيح دماغ وحضور كامل في الكلاسات ومذاكرة أول بأول. لا تستهينوا فيها حتى لو فهمتوها لأن اختباراتها فيها خدع كثير البنات ما ينتبهولها.

توزيع الدرجات:
في دي السنة كان توزيع الدرجات مختلف عن المرة اللي قبل.
دي السنة: الدوري الأول 30، الدوري الثاني33، النهائي 40.
المرة اللي قبل: الدوريين الأول والثاني 30، النهائي 40. وسوولنا كيرف أب. *راح أشرح معناها بعدين*.

المصادر اللي ذاكرت منها:
الكتاب أهم شي طبعًا والأسئلة اللي فيه وفي الأسئلة الخارجية اللي راح تلاقوها في البلاك بورد أو موقع أستاذتكم.
الأسئلة اللي في الكتاب يحلوها أستاذات في كلاسات إضافية وقت البريك الساعة 12 لحدت 1 يسموها *سكشن إحصاء* مهمة جدًا تفرق معاكم كثير لأنها تجبركم تحلو وتدربوا يدكم.
أنا المرة الأولى ما كنت أحضر سكشن وجبت 91 والمرة دي بعد ما سرت أحضره وأركز بزيادة في الكلاس جبت الدرجة الكاملة الحمدلله.
أصلًا إحساسي بالفهم أختلف وأتحسن لما سرت أحضره.

أفضل الأستاذات: أستاذات الإحصاء الكويسات كثير، أنا جربت منهم دعاء بوقري وممتازة ماشاءالله ومنظمة وتشرح بالتفصيل ما أتخيل في أحد أحسن منها حتى السكشن أحضر في اليوم اللي هيا تعطيه. فيه أستاذة أروى وأريج يمدحوهم برضو، وغيرهم بس مو فاكرة أسماءهم.
أستاذة دعاء كنت أحضرلها إضافي وهيا مو أستاذتي الأصلية، أستاذتي الأصلية اسمها د.علياء وسيئة صراحة لأنها تعاملنا كأننا فاهمين المادة يعني أعلى من مستوانا ومرة مو متمكنة من المنهج. وقبلها درستنا وحدة اسمها هدى وبرضها مو مرة كويسة، وفي مقياس تقدروا تستخدموه عشان تعرفوا مستوى الأستاذة وهوا السؤال، اسألوها ولو قدرت تفهمكم وتوصل لكم المعلومة بكل وضوح معناته هيَ جيدة.

الطرق اللي اتبعتها في المذاكرة: أول فصل نظري بحت لازم لازم تحفظوه أول ما تخلصوه، كله مصطلحات إحصائية، بعد كذا ذاكروا أول بأول لو بس تراجعوا التعريفات بشكل سريع والقوانين وتطبقوها على الأسئلة وتحضروا السكشن نهاية الأسبوع عشان تتأكدوا من صحة حلكم.

*مصطلحات الإحصاء نوعًا ما معقدة، أسهل طريقة عشان لا تلخبطوا بينها إنكم تطلعوا لكل تعريف الـkey word *كلمة مفتاحية* تميز كل تعريف بشكل واضح. يصير بس لو شفتوا الكلمة دي تعرفوا تبع أي تعريف هيا.


كذا انتهينا من مواد ترم واحد، ننتقل للترم اللي بعده:


فيزياء:
المنهج عبارة عن أساسيات الفيزيا وتحديدًا علم الميكانيكا، الحركة والقوى ونيوتن. لازم تركزي مع الأستاذة في الكلاس وتنتبهي لتعليقاتها بخصوص الأسئلة، كمنهج كان سهل وممكن تخلصي مذاكرته في يومين وتحسي إنك راح تجيبي الدرجة الكاملة مع البونس من سهولته. كاختبار كأنه قدرات أو اختبار لذكائك. السلايدات وحدها مستحيل تكفي.

توزيع الدرجات:
الدوري الأول 33، الدوري الثاني 33، النهائي 44.
والبونس اللي تاخذيه في الدوريين يطلعو معاكي للنهائي زي الأحياء.

المصادر اللي ذاكرت منها:
السلايدات عشان أعرف محتوى المنهج وأنظم أفكاري للمذاكرة، ملخص "هناء فرحان" فيه القاعدات الإضافية وفيه طرق لحل الأسئلة اللي تجيكي نفس أفكارها في الاختبار، حل الـ test bank وأسئلة السنوات اللي قبل لو أتوفرت، كل ما يدك أخدت عالحل والأفكار كل ما كان أحسن.
بس برضو حتدخلي الاختبار وتواجهي أفكار جديدة وتخرجي مو عارفة حليتي صح ولا لا بس استعدو كويس وما تلاقو إلا الخير يارب.

أفضل الأستاذات: أنا تأسيسي كان سيء في الثانوي فيمكن ما أقدر أحكم صح. درستني أستاذة وجود ديري وأشوف إنها ممتازة وشرحها واضح وتجاوب على الأسئلة وتعيد الشرح لو ما فهمتي، أسستني كويس وقدرت أجيب درجة كاملة الحمدلله بس بالإضافة للكلاسات بذلت جهد كبير في المذاكرة ومن كل المصادر اللي ذكرتها فوق. لأني أهملت في المرة الأولى درجتي كانت 88 =\ فيفرق كثير لما تعطوا المواد حقها وتعرفوا نقاط ضعفكم وتعرفوا كيف تحسنوا نفسكم.

طرق المذاكرة اللي اتبعتها: أذاكر من السلايدات وأحل الأسئلة اللي فيها أراجع ملخصات هناء فرحان وبعدها أحل أسئلة test bank.
*عشان تحلوا كويس الفيزياء والكيمياء لازم تكتبوا المعطيات في السؤال وتحددوا المطلوب وتحددوا بناءً على ذلك أي قانون راح تستعملوا.
الرياضيات:
آخر المواد العلمية، المنهج عبارة عن تكملة للي أخذناه في الثانوي، دوال واشتقاق ونهايات.
سهل وواضح ويعتمد كثير على تركيزك في الكلاسات وفهمك وبعد كدا تطبيقك.

توزيع الدرجات:
الدوري الأول 31، الدوري الثاني 31، النهائي 42.
4 بونس ونفس نظام الفيزياء والأحياء.

المصادر اللي ذاكرت منها: الكتاب وأسئلته تخليكي تجيبي الدرجة الكاملة بس فيه مصادر ممكن تفيد زي الworkshop وراح تلاقوها في مواقع الأستاذات.

أفضل الأستاذات: كثير أستاذات ممتازات في الرياضيات لأنه واضح وغير معقد.
درستني أستاذة منى منصوري هيَ سريعة لكنها ممتازة مرة وتفهم. عيبها تأخذ اكسترا "كلاسات إضافية" من وقت البريك. غير محسوبة من ساعاتك لكن مجبرة تحضريها عشان أحيانًا تشرح فيها دروس جديدة مو بس تحل تمارين.
فوت كم كلاس في الأيام الأخيرة لأستاذة منى وعلى حظي في أستاذة ما خلصت مع طالباتها فحضرت لها وهي أستاذة غادة مطر. أتعب وأنا أقول قد ايش رائعة وتفهم وأنا حضرت لها ثلاث ساعات بس شرحت فيها كثير دروس ووصلت المعلومة بكل سهولة. وعندها ملخصات مرة تساعد وتسهل المنهج للناس اللي تستصعب المادة. إذا اللي تدرسك ما تفهم احضري لها وحتى لو تضطري تقعدي وقت أطول في الجامعة.

الطرق اللي اتبعتها في المذاكرة: لأني ما عندي مشاكل مع الرياضيات كنت أذاكره قبل الاختبار وأحل الأسئلة وبس.

*أول اختبار حيكون فيه كثير أسئلة عن المجال والمدى ودا مرة يلخبطوا فيه البنات وينقصوا، وتمثل ثلث الأسئلة أو نصها، ركزو في السؤال هوا اش طالب.


نجي لأسهل مادتين اللي مفروض تجيبو فيهم ال100 بكل سهولة:
حاسب ومهارات اتصال.

الحاسب:
فيه الويندوز وبرامج الأوفيس ونفس نظام اختبارات الثانوي: نظري وعملي، سهلة جدًا بس انتبهوا لجزئية النظري حفظها كثير ويلخبط بس ما تحتاج لمذاكرة أول بأول يكفي مذاكرة قبل الاختبار بيوم أو يومين، أما العملي فأحرصوا ما تسحبوا واحضروا عشان تطبقوا مع الأستاذة وتعرفوا كيف طريقة الاختبار.

تقسيم الدرجات: تختلف حسب السنوات.
اللي أفتكره إن
الدوري الأولي نظري: 15 وعملي: 15.
الدوري الثاني عملي: 20.
والباقي اتلخبط التوزيع عشان قرار أنه نخلص قبل رمضان بس نفس نظام الدرجات فوق وما في اختبار درجته أعلى من 25 سواء نظري أو عملي.

مصادر مذاكرتي:
النظري من الكتاب، احفظوه وافهموه من قلب لأنهم يجيبوا أسئلة من وسط السطور.
العملي برضو طبقوه من الكتاب مع تطبيق الأستاذة في الكلاس يكفي.

الأستاذات:
ما يحتاج تدققوا عالأستاذات في الحاسب.
لكن أستاذة سارة نصيف اللي درستني في المرة الأولى رائعة والله قعدت في بالي بعد فترة طويلة وكل ما اتذكرها أدعيلها ما أدري ليش. كل اللي درستني ياه قبل كم سنة قعد في بالي مع إنه حاسب ما يحتاج، لكنها تدخل المعلومة بأسلوب لطيف وتخليها تثبت، صرت لما أطبق مع الأستاذة الجديدة أحس إني فاهمة وفاكرة كثير أشياء منها الله يسعدها.

مهارات الاتصال:
مادة مهمة لكِ كطالبة جامعة، المعلومات اللي يحتويها زي معلومات كتب التطوير، راح تفيدك المهارات اللي فيه في مشوارك الجامعي وفي شغل القروبات وفي حياتك بشكل عام. لا تستهينوا فيها إنها بس كلام فاضي، نبهتني لأشياء كثير أحتاج أعدلها في نفسي.

توزيع الدرجات:
على خلاف باقي المواد، فيها دوري واحد وعليه 30 درجة.
و3 واجبات أو مشاريع عليهم 30 درجة.
اختبار قراءة وعرض تقديمي وكتابة سيرة ذاتية وخطاب عمل.
واختبار نهائي 40 درجة.

مصادر المذاكرة: الكتاب وزي الحاسب لازم تفهمي وتنتبهي للي بين السطور، يلعبوا كثير بالكلمات ويلخبطوك وممكن تغلطي في أشياء سخيفة، نقصت فيها 3درجات وصراحة تقهر.
أحيانًا يجيبولك سؤالين فيهم نفس الفكرة لو حليتي واحد صح راح تحلي الثاني صح ولو غلطتي راح تغلطي في الاثنين، ورطة.

أحسن الأستاذات:
برضو زي الحاسب ما يهم الأستاذة بس يفضل ما تكون عبيطة تدقق في المشاريع وتنقصك فيها.

*تفضيل شخصي: من أحب المواد لقلبي وأمتع الكلاسات، أحب الأستاذات اللي يعطو فيها بإخلاص ويشاركونا تجارب وينصحونا وما يقرأو من الكتاب بس لأنها زي الدورات اللي تنعطى في تطوير الذات.
المادتين ما أذاكرهم أول بأول، أخليهم لقبل اختبارهم بيوم أو يومين.


النقطة الثانية اللي راح أتكلم عنها هيَ بعض المصطلحات الجامعية وغالبًا راح تكون جديدة عليكم.

أولًا المصطلحات اللي تخص الدرجات.
بونس: درجات زيادة يا إما يحطوها في أسئلة إضافية زي في الفيزياء والأحياء الدرجة تكون من 110 والرياضيات من 104 أو يزودوها للبنات بدون أسئلة زي الكيمياء كان من 100 بس يمكن أعطونا خمسة درجات زيادة لكل الدفعة، هدية.

كيرف أب: أحيانًا يسووها في الإحصاء، وهيَ زيادة بالنسبة.
كيف يعني بالنسبة؟
مثلًا يختاروا نسبة 5% أو 6% أو 7% حسب نسبة الرسوب، ويزيدوا الدفعة كلها بدي الطريقة وبالتالي الزيادة حتختلف، كل ما كانت درجتك أعلى كانت زيادتك أعلى.
نفرض كانت الزيادة 6% ووحدة جايبة 85 راح تصير درجتها 90 وبدال ما تكون B+ تصير A، والثانية درجتها 95 راح تصير 100 وهكذا.

مصطلحات الأسئلة الإضافية:
الأسئلة اللي من خارج المنهج ومعظم الأستاذات يطالبوا بحلها وممكن يحلوها معاكم في كلاسات قبل الإختبارات غالبًا تكون workshop, test bank, worksheet.

سكشن: محاضرة إضافية رسمية من الجامعة ولها جدول وتكون وقت البريك فيها أستاذات يدرسوا المادة يحلوها مع البنات ويجاوبوا على أسئلتهم.

Course syllables: هي زي الفهرس يحدد إش اللي معاكم في المنهج من عناوين وأسئلة. ممتاز مرة ويفضل تطبعوه لأنه يساعدكم تنظموا مذاكرتكم، الوضع بدونه ملخبط.

السلايدات: هيَ بديل للكتاب، معظم الأستاذات ما يستخدموا كتب في الشرح، نقدر نقول يستخدموا ملازم محتواها مأخوذ من الكتب بس بشكل منظم وبإعادة ترتيب من أحد أساتذة الجامعة.

الحرمان: إذا غبتي أكثر من 5 أو 6 كلاسات في المادة الوحدة بدون عذر، راح يجيكي تنبيه وممكن تنحرمي من اختبار المادة النهائي وغالبًا رسوب إلا إذا درجاتك كاملة في الاختبارات الدورية.


ثالث نقطة بتكلم عنها هيَ البرامج اللي تبقيك على تواصل مع الجامعة والأستاذات والأشياء اللي تهمك كطالبة من أسئلة وتعريف بمحتوى المنهج و...الخ.

أول برنامج هوَ الأوديس وأكيد تعرفوه موجود فيه جدولكم وتنزل فيه درجاتكم وحتى اختيار التخصصات نهاية السنة بيكون عن طريقه.

برنامج بلاك بورد، هوَ غالبًا راح تلقو فيه السلايدات والtest bank والأشياء اللي تهمكم في المذاكرة والواجبات "إذا فيه يعني"، وممكن الدرجات تنزل فيه.

تطبيق my KAU هذا التطبيق يستخدم غالبًا للتواصل مع الأستاذات، وإذا اعتذرت أستاذة عن الحضور راح تبلغكم برسالة عن طريقه.

الإيميل الجامعي برضو يستخدم للتواصل مع الأستاذات وعشان ترسلوا الواجبات لهم.

تفصيل هذه البرامج وكيف تدخلوا لها وطرق إنشاء حسابات فيها راح يقولوا لكم ياها بالتفصيل في الملتقى التعريفي بداية السنة.
واستخداماتها أكيد أكثر من كدا بس دا اللي غالبًا راح تحتاجوها فيه في التحضيري.

رابع نقطة راح أتكلم عنها هيَ الكلاسات الإضافية والمواعيد المكتبية للأستاذات:

أحيانًا تواجهوا صعوبة في حل سؤال أو فهم نقطة في درس وتنحرجوا تسألوا قدام الكلاس، الحل في هذه الحالة إنكم تروحوا للأستاذات في مواعيدهم المكتبية اللي هما راح يقولوها لكم في بداية السنة.

وإذا أستاذتكم مرة ما تفهم وما ناسبتكم؟
حاولوا تغيروها بإنكم تروحوا للشؤون وقبلها تاخذوا موافقة أستاذتكم والأستاذة اللي بتروحوا لها وتشوفوا إذا ما كان عند الأستاذة الجديدة اكتفاء ومساحة كلاسها تكفي ووقته يناسب جدولكم. وممكن تحضروا للجديدة مرة عشان تتأكدوا إنكم فاهمين منها.

وإذا اتعقد الموضوع وما قدرتوا تحوّلوا؟
احضروا إضافي لأي أستاذة ممتازة.
في هذه الحالة ممكن تبلغي أستاذتك إنك ما تقدري تحضريلها وأوجدي عذر مناسب "بيتي بعيد" لو كان كلاس صباح، أو جدولي ما يتناسب مع جدول أختي، وقوليلها بحضر لأستاذة فلانة وهيَ ممكن تتسامح معاكي وتحسب حضورك للأستاذة الثانية حضور عندها.

وإذا رفضت؟
أحضري لها عشان ما ينحسب لك غياب ويعطوكي حرمان، وأحضري للأستاذة اللي تفهمي منها زيادة، استأذنيها وغالبًا ما راح تعترض.

الجامعة أحيانًا تدقق في هذه الأشياء عشان ما يفتحوا الباب لباقي البنات إنهم يطلبوا تحويل ويصير الوضع فضوى. فأفضل لك تحضيري بشكل غير رسمي بس أهم شيء ما تنسي حضورك عند أستاذتك الأصلية وإذا قررتي تسحبي مرات لا تزيدي عن الحد المسموح لك.

نجي لنقطة من أهم النقاط وهيَ طريقة حساب المعدل بالتفصيل:

فيه معدلين: معدل ينحسب من 5، هذا ما يهمّكم كطالبات تحضيري. يهمّكم في التخصص.
ما راح أذكر طريقة حسابه لأنها سهلة ولأنكم مو في حاجتها.
بس بشكل عام:
الدرجات ما بين 95-100 تعادل ال5
90-94 تعادل 4.75
85-89 تعادل 4,5
80-84 تعادل 4
75-79 تعادل 3,5
70-74 تعادل تعادل 3
وهكذا لحدت ال60 اللي تمثل درجة الرسوب.
معدل ينحسب من 100 وهذا اللي يهمّكم لأنه هوَ اللي تحاسبوا عليه في وقت التخصص.
ينحسب زي المعدل التراكمي في الثانوي
مجموع (ساعات كل مادة مضروبة في درجتك في المادة)/ مجموع الساعات.
ساعات كل المواد 3 باستثناء الإنجليزي 2.
مثال
وحدة درجاتها
كيمياء 95/ 95*3=285
أحياء 99/ 99*3=297
فيزياء 98/ 98*3=294
إحصاء 92/ 92*3=276
رياضيات 97/ 97*3=291
حاسب 100/ 100*3=300
مهارات اتصال 100/ 100*3=300
انجليزي 3: 95/ 95*2 = 190
انجليزي 4: 91/ 91*2= 182
مجموع الدرجات بعد ما ضربناها في الساعات=2415
مجموع الساعات= 25
مجموع الدرجات قسمة مجموع الساعات= 96.9

هذه النسبة هيَ اللي تنافسي فيها باقي البنات، المنافسة قوية وممكن فواصل تفرق وتفصلك عن التخصص اللي تتمنيه.

يندرج تحت هذا المعدل "المعدل الخاص"، يالله ما خلصنا من حكاية المعدلات؟
لا =(

هذا المعدل هوَ عبارة عن درجاتك في المواد المهمة للتخصص، كيف يعني؟
مثلًا الأحياء والكيمياء والفيزياء والإنجليزي مواد مهمة للطب، في شروط إنه لازم ما تقل عن درجة معينة *راح تلاقوها لكل التخصصات في كتيب يتوزع في الملتقى التعريفي*.

طيب وبعدين كيف يتم الاختيار؟

بناءً على نسب البنات اللي اختاروا التخصص، يختاروا الأعلى وبعد ما يختاروا يشوفوا هل حققتي النسبة الخاصة؟ ممكن نسبتك عالية وجايبة 100 في كل المواد إلا الكيمياء ناقصة فيه 16 دا ممكن يخلي نسبتك 98 وشوية ويدخلك التخصص بس انتي ما حققتي شروط النسبة الخاصة.

طيب لو جبت في الكيمياء والفيزياء والأحياء والإنجليزي كامل، راح أضمن أدخل طب؟

لا.
لازم معدلك الموزون يكون عالي هوَ الأهم وهوَ اللي المقارنة والاختيار يعتمدوا عليه. الخاص بس عشان يتأكدوا إنك ما نزلتي فيهم عن الحد المطلوب.

يعني لو نقصتي كثير في الحاسب ولا المهارات *ترى ساعاتهم زي ساعات المواد الثانية وتأثيرهم كبير على المعدل*، راح ينقص معدلك وممكن يؤثر على دخولك للطب.

دا مجرد افتراض ما قد سمعت إنه حصل لأحد، غالبًا اللي يجيبوا درجات عالية، يجيبوها في كل المواد.
وخلاصة الكلام والشرح إنه ركزوا على النسب بشكل عام وبعدها على المواد الخاصة بالكلية.

راح أشارك النسب اللي وقف عندها القبول في السنتين الماضية عشان تشوفوا الفرق وعشان تقدروا تقارنوه بدرجاتكم ومعدلاتكم:
هذه حق دفعة 16:

ودا حق دفعتنا 17:



شايفين كيف الأرقام دقيقة؟ والفرق بين السنتين؟ قيسوا عليهم.

انسوا شي اسمه معدل وركزو عالنسبة الموزونة لأنه ممكن تكوني جايبة معدل خمسة بس ما تدخلي التخصص اللي تبغيه، ليش؟

لأنو اللي تجيب 100 في كل المواد معدلها من 5 زي اللي تجيب 95 في كل المواد فممكن تكوني جايبة 5 بس ناقصة درجات كثير.

المعدل الجامعي اللي من 5 أعتبروه معدل شكلي ما فيه تفصيل للدرجات بشكل كبير، لا تهتموا بيه في التحضيري.




آخر شيء نصائح أعتبروها من أخت لكم مرت بالتجربة قبلكم وحابة تفيدكم:

• هل ضروري تكونوا مرة تفهموا انجليزي؟ لا مو ضروري. المصطلحات الجديدة راح تكون صعبة لأنها ما قد مرت عليكم سواء بالعربي أو بالإنجليزي. اللي عليكم تسووه إنكم تذاكروا المصطلحات أول بأول.


• لا تشتتوا نفسكم بالمصادر المختلفة من ملازم وأساتذة يشرحوا في يوتيوب أو أساتذة يدرسوكم بمقابل مادي إلا لو كنتوا مرة مو فاهمين بعض النقاط، ابحثوا عن الشي اللي مو فاهمينه بالضبط ولا تبالغوا في التدقيق على تفاصيل زيادة ما تهمكم. التزموا بأسهل نظام يناسبكم ويضمن لكم الدرجات.


• ابذلوا كل اللي تقدروا عليه ولا تستهينوا بشيء أبدًا، هذه سنة مصيرية غالبًا راح تحدد مسار حياتكم المهنية.


• اسألوا ولا تستحوا أبدًا.


• لا تستلموا وتحبطوا، أول درجات ممكن تكون مو قد توقعاتكم، اعتبروا أول اختبار تجربة لكم ولنظام اختبارات الجامعة. لا تيأسوا وراجعوا نفسكم وشوفوا كيف ممكن تتحسنوا؟ تطبقوا أكثر أو تركزوا أكثر في الكلاسات أو تحضرو إضافي. ممكن تروحوا لنفس أستاذة المادة تسألوها عن طرق تساعدكم ترفعوا درجاتكم. أو تسألوا البنات اللي حولكم كيف درجاتهم ولو كانت كويسة كيف ذاكروا واش مصادرهم. صحبتي نقصت درجات كثير في مادة وما يئست ماشاء الله جابت درجات كاملة في كل الإختبارات اللي بعدها وجابت درجات أسئلة البونس وكمان الجامعة أعطت بونس إضافي وجابت ال100 في النهاية. هيّا قدرت أكيد إنتو تقدروا.


• انتبهوا من البنات اللي يحبطوكم بأي طريقة، يشغلوكم أو يقولولكم اش الفايدة وإنه مستحيل تدخلوا تخصص عاجبكم أو يقولوا درجاتهم العالية فيخوفوكم. ركزوا في نفسكم.


• تعاونوا، لقيتو أسئلة إضافية أو تسجيلات أو معلومات قالتها أستاذتكم سهلت المنهج شاركوها في القروبات لأنو قد ما تعطي يساعدوكي بالمقابل وربي يوفقك قبل كل شي.


• لا توصلوا للأستاذات إنو عندكم مصادر أسئلة السنوات اللي قبل أو تسجيلات، لا تورطوا نفسكم.


• نجاح غيرك ما يعطّل نجاحك، ابعدوا عن الحسد والمقارنة.


• المذاكرة أول بأول تريحك وتخفف عليك كثير ولبعض المواد ضروري مرة.


• عادلوا الإنجليزي لو قدرتو*تفضيل شخصي* لأنه يأخذ وقت *أربع ساعات في اليوم* ويرجعك البيت مجهدة وممكن يؤثرعلى مذاكرتك للمواد الثانية. ولو ما قدرتو شدو حيلكم وحاولوا ما تنقصوا فيه.


• لا تفوتوا المحاضرات، لا تفوتوها، لا تفوتوها. ولا تنشغلوا فيها بكلام أو بجوال أبدًا واحضروا بدري عشان تلاقوا مكان مناسب وقريب من الأستاذة.
• خلو عندكم فكرة عن كل التخصصات وخلوكم مرنين وحطوا خطة بديلة لو ما انقبلتوا في التخصص اللي حطيتوه أول شيء.


• وفرو الكتب والسلايدات أول بأول عشان تكتبوا عليها تعليقاتكم وملاحظاتكم في الكلاس.


• ذاكروا بذكاء، لو لأي سبب ما قدرتوا تذاكروا قبل الاختبار بفترة وبقيلكم يومين مثلا، اضغطوا على نفسكم مرة وركزوا على الأفكار الرئيسية وخذو نظرة على أسئلة السنوات اللي قبل عشان تفهموا نظام الأسئلة كيف راح يكون، كذا توفروا وقت وجهد وتضمنوا تجيبوا الدرجة الكاملة.


• ممكن تسمعوا أشياء زي لا تتعرفي على بنات عشان لا يشغلوك عن الدراسة في دي السنة، ما عليكم فيهم وشوفوا اللي يناسبكم وبالعكس ممكن تلاقوا بنات يدعموكم ومستواهم مرتفع وممكن بنات لطيفين يغيروا من نفسيتك ويساعدوك تنسجمي في البيئة الجديدة.


• انتو في مرحلة انتقالية احتمال كبير نفسيتكم تكون تعبانة، صحباتكم مو معاكم ومشتتين وصعب تركزوا، حطوا في بالكم إنها سنة وحدة ممكن تطلعكم فوق وممكن تنزلكم تحت، اتجاوزوا العوائق النفسية وركزوا على هدفكم.


• لا تغتروا بدرجاتكم لو كانت عالية في البداية، لازم تبذلوا جهد طول الطريق، إهمال اختبار واحد ممكن يخليكِ تعضي أصابع الندم على قولهم.


• سر الكيمياء: بنك الأسئلة، الفيزياء: ملخصات هناء فرحان وأسئلة السنوات اللي قبل، الإحصاء: السكشن، الرياضيات: أسئلة الكتاب، الأحياء: الحفظ بفهم، الاتصال والحاسب: التركيز على ما بين السطور.


• حلو الاختبار التجريبي اللي ينزلوه الأستاذات قبل الاختبار، جزء من الأسئلة يجي منه.


• المباني باردة في الجامعة وإذا لبسكم مو مناسب ممكن تتشتتوا خاصةً في الاختبارات، وبين المباني السقف مكشوف والجو حار، البسوا تي شيرت أو شي خفيف وشيلوا معاكم جاكت.


• احضروا الملتقى التعريفي حتى لو قالو لكم إنه ما يفيد، يكفي إنه يحسسكم بالانتماء للجامعة ويعطيكم فكرة عن كيف حتكون الأجواء.


• العبرة مو في إنكم تذاكروا كثير ومن مصادر كثير، أعرف بنات يذاكروا من كل مكان وينقصوا فوق العشرة درجات.


• راجعوا معدلاتكم وأحسبوها بنفسكم أول بأول ولو نقصتوا في مادة كثير، عوضوها في مواد ثانية.


• لا تحرموا نفسكم من الطلعات وإنكم تستمتعوا، رفهوا عن نفسكم عشان تجددوا طاقتكم.


• فكروا بمصلحتكم بدون ما تضروا أحد، في شغل القروب ممكن تكون معاكم بنت قلق تبغى تفرض رأيها أو ما تشتغل، حاولوا تكونوا مرنين ولا تتصادموا كثير عشان أهم شيء الشغل يمشي وما تنقص درجتكم، ممكن تقابلوا بنت تشوف نفسها صح وإجاباتها صح وتجادلكم كثير، طنشوها لأنها طاقة سلبية وراح تنرفزكم على ولا شيء. خليكم هادئين مركزين محددين هدفكم وطريقكم واضح واستمتعوا.


بكذا نكون ولله الحمد اختتمنا موضوعنا وغطينا السنة التحضيرية من أهم النواحي.
إن أصبت فمن الله وإن أخطأت فمن نفسي.
هذا الكلام كله وتفصيلي له وتشديدي على المعدل الموزون مو عشان أخوفكم قد ما عشان أنبهكم للتفاصيل اللي ممكن يغفلوا عنها في الملتقى بينما هيا من أهم الأشياء اللي تخلي طريقكم في التحضيري واضح وسهل.

في الختام انبسطوا وعيشوا الحرية اللي ما كانت موجودة في المدارس =)، على قد ما راح تشوفوها سنة صعبة إلا إنها أسهل السنوات الجامعية رغم ضغطها على نفسيتكم، انبسطوا في عالمكم الجديد والسلام عليكم.



أي سؤال أو استفسار
هذا حسابي في آسك @ZXenon_






















Professor.Amany 05-28-2018 02:27 AM

Re: كيف قدرت أحصل على معدل عالي في السنة التحضيرية/علمي جامعة الملك عبدالعزيز؟
 
جزاك الله خير

وكل التوفيق يا رب :)


الساعة الآن 05:04 AM

Powered by vBulletin® Version 3.8.11
Copyright ©2000 - 2019, vBulletin Solutions Inc.