منتديات يزيد التعليمية


عذراً سياسة المنتدى تمنع وضع الموسيقى ووضع الصور النسائية في التواقيع والمواضيع والصور الرمزية والشخصية

المنتدى للبيع


العودة   منتديات يزيد التعليمية > منتديات قياس ( qeyas ) > قسم قياس العام > تجارب وتعليمات ولقاءات

موضوع مغلق
 
أدوات الموضوع انواع عرض الموضوع
قديم 09-13-2013, 06:18 PM   رقم المشاركة : 1
D-harten
مشرف منتدى قياس العام
 
الصورة الرمزية D-harten






الحالة
D-harten غير متواجد حالياً

 
D-harten عضو مبدع لامحالةD-harten عضو مبدع لامحالةD-harten عضو مبدع لامحالةD-harten عضو مبدع لامحالةD-harten عضو مبدع لامحالةD-harten عضو مبدع لامحالةD-harten عضو مبدع لامحالةD-harten عضو مبدع لامحالةD-harten عضو مبدع لامحالةD-harten عضو مبدع لامحالةD-harten عضو مبدع لامحالة


 

Abdullah.Sa3ed .. تجربتي مع اختبار القدرات (طريقك الى 100%) I Vs Qeys






الموضوع هقسمه لثلاث أقسام ، القسم الأول هكتب فيه تجربتي المتواضعة ، القسم الثاني هسيبه لأسئلتكم وردي عليها و القسم الثالث هيكون فيه كل ما أنصحكم به وشكر خاص للقائمين على المنتدى وأعضائه الكرام .


أنا درست في مصر لحد 2 متوسط وكانت كلها سنوات جميلة جدا عشت فيها مع مدرسين ممتازين وأكفاء والحمد لله كللها الله بالنجاح لي و التفوق ، لما جيت السعودية في 2 متوسط لقيت نظام تعليم مختلف خالص واستغربت لما عرفت ان الاستاذ بيحدد للطلبة الحاجات اللي هتيجي في الاختبار ، التغير الحاد في أداء المعلمين اللي شفته برده حيرني وكنت شكلي هنزل مصر ، بس كملت 2 ودخلت 3 برده لكن لقيت ان المدرسين اتحسنو شوية عن مدرسين 2 فقررت اني هكمل دراستي في السعودية وأمري لله لأن أهلي كلهم كانو مسرورين وانا الوحيد اللي مش راضي فقلت اتنحى انا عن موقفي في الاجازة اللي قبل 3 متوسط سمعت عن حاجة كدا اسمها القدرات بدأت اسأل وكنت دايما بسأل المدرسين السعوديين كانو بيدوني أمل كبير الصراحة كان أغلب كلامهم تحطيم ويا ويلك وحاجات تشاؤم كلها حتى المصريين أصحابي نفس اللغة دي قلت لازم اعرف ايه الاختبار ده ، انا ليا أخ أكبر مني بسنة ، وهو كان يهمه الامر أكتر مني لانه هو اللي هيتمحن قبلي بحثنا في جوجل لقينا موقع قياس فتحناه ودخلنا ع الامتحان التجريبي بتاع الموقع ساعتها صدقت كلام اصاحبي و المدرسين ومش فاكر جبنا كام بس جبنا درجة مشرفة جدا هيا ما بين 70 - 80 لاننا كنا بنستطلع بس برده قابلتني أسئلة حسيت اني بحل في من سيربح المليون وخصوصا السؤال بتاع التناظر (متعلم ~ معلم) اللي اجابته (فراشة ~ مصباح) لما قريت الاجابة قلت الناس دي عندها عقل قوي كدا من ساعتها اخويا بدأ يبحث في شأن القدرات ومحتارين هننزل مصر ولا هنكمل في السعودية المهم اخويا دخل أول ثانوي واستفسر عن الموضوع بشكل موسع واشترى كتاب رام و الفائق وخلصناهم مع بعض ساعتها بدأنا نعرف يعني ايه قدرات ونوعية الاسئلة بتاعته وفي يوم من الايام اخويا سمع ان فيه واحد مصري في مدرسة قريبة مننا جايب 97 من اول مرة كان المصري ده في 2 ثانوي ساعتها واخويا في اولى ، طبعا صيته ملأ الهفوف(في الاحساء) كلها وصراحة كنت بعتبره من العباقرة مع أني معرفوش ولا عمري كلمته ، واخويا في يوم عرف ان فيه منتدى اسمه يزيد بيدعم طلبة الثانوية في حكاية القدرات فدخل حمل تقريبا 2 جيجا او اكتر وكان ساعتها المنتدى مش منظم كحالته الآن وكان صعب البحث فيه بس المضطر يركب الصعب ، واستمر اخويا في مذاكرته للقدرات اللي بدأها من بداية أول ثانوي واكتسب خبرة واسعة المدى من منتدى يزيد بس مكنش بيحاول يتناقش وكدا لان طبعه انو واثق من نفسه في حل أي سؤال وبسبب كدا كانت درجته في الجزء اللفظي أول مرة مش حلوة كانت 81 اما الكمي فكان مستواه حلو فيه كأول مرة 95.8 والمجموع الكلي 89 بس كانت درجته على مستوى المدينة أعلى درجة في 2 ثانوي ، انا تطرقت لموضوع أخويا لانه كان في وش المدفع وانا باخد خبرته من بعده انا بقى بدأت في الترم الثاني من أولى ثانوي بعد ما لقيت الدرجة المجحفة اللي جابها أخويا لحسن اجيبها انا كمان بدأت اذاكر (أبدأ من هنا) و(الفائق) و (رام) ، أبدأ من هنا كتاب رائع جدا جدا نقلني من الصفر الى مستوى عالي جدا ، وطبعا كالعادة مليء بالأفكار الجديدة اللي بتتنسي بسرعة لاني مكنتش بزاكر القدرات في تواصل ، كنت بنقطع شوية للمدرسة وانقضى الترم الثاني وقفلت في المدرسة الدرجة كاملة ، قلت بقا ابدأ بجد في مذاكرة القدرات عيدت أبدأ من هنا تاني وكنت أسرع من الاولى شويتيتن وكنت فاكر ان القدرات دي كمي بس اللفظي ده كنت راميه خالص ولا اعرف عنه حاجة ، وهكذا استمرت الايام الى أن بدأ الترم الأول من السنة الموعودة 2 ثانوي وكان فاضل 3 شهور على الاختبار او 4 بدأت مذاكرة القدرات بشكل انتحاري ، خلصت ملفات كتير في الكمي من يزيد وشاركت في مسابقات اتعملت هنا في يزيد أول يوم سجلت فيه في المنتدى لان مستوايا كان عالي لاني مخلص أبدأ من هنا منذ زمن قصير يعني ملحقش يتبخر ، وكنت عضو فعال وممتاز وجبت وسام من أول يوم ، فلقيت الحكاية حلوة خليت نظامي كله مسابقات ، واكتسبت خبرة من الاعضاء اللي بيشاركو فيها ، وكانت أحسن مسابقة كمي في المنتدى معمولة في الوقت ده اسمها (من الأسرع) من إعداد فارس الاحلام ، وسعيد ما شاء الله عليه كان بيلبنا أسئلة فظيعة أنا كنت بعجز أمام بعضها واستمرت الايام وقلت في نفسي أخويا جاب درجة وحشة في اللفظي لانه كان مهمل فيه لازم افتحه ومش هخسر حاجة ، فتحت ملفات المعاني وقعدت احفظ فيها واحفظ وكل معنى جديد كنت بحطه في دفتر والدفتر كان بيتملي كله في يومين بالكتير عملت ييجي 3 دفاتر او 4 وخلصت المعاني كلها اللي في يزيد ، قلت بقا نروح ع المعجم ، وكنت ببحث عن كلمة والاقي شوية كلمات جمبها بسجلهم في ملف word ، واقعد احفظ فيهم ، يعني كنت فاهم ان اللفظي معاني وبس وساعتها نزلت الملف ده المنتدى حسيت اشمئزاز الاعضاء انهم يزاكرو 30 صفحة معاني من المعجم ، بس انا كنت حفظتهم ، فتحت حاجات في التناظر و اكمال الجمل لقيت نفسي حلو في الاكمال و التناظر نص نص والاستيعاب كنت فاشل درجة أولى ، وكل ما اشوف كتاب غير اللي عندي الاقي كلام مخالف لاجابات نفس القطعة يعني حاجة تحير ، واشتريت كتب كتير ولقيت من بينهم كتاب بكار صراحة كتاب اسطورة لما خلصته حسيت اني بقيت صاروخ في الكمي ، واللفظي ما زلت في المعاني لفشلي الذريع في باقي الاقسام بسبب الكتب المحيرة وبعض ملفات يزيد المتناقضة ودخلت أول اختبار في شيء من الرهبة والقلق وعدم الثقة و طبعا التشجيع من أخويا اللي كان بيقولي ابقى قابلني ان عديت 88 صراحة كلها كانت ظروف صعبة جدا بالنسبة لأول مرة اختبر فيها والاقيها كدا قلت انا شكلي مش هنجح في الحكاية دي ودخلت قاعة الاختبار يوم الخميس الاول مع أخويا وكان الفرق بينا خمس كراسي بس ، والمراقب شك فينا وكان مراقب بطيء اللجنة كلها سلمت الورق ، ما عدا سعادة الباشا اللي قاعد يشرب قهوة والمشرف العام عمال يقول الخطوات و الطلاب تنفذ واحنا لسا مستلمناش الورق اصلا فاضيقت من اولها لاني قلت اني هتاخر في تسجيل البيانات أكيد وتاخرت فعلا وزاد الطين بله اني من الرعشو مكنتش قادر امسك القلم ، شعور بالتوتر لا حدود له وبدأ الوقت وانا مكملتش البيانات وفتحت القسم الاول لقيت 4 تناظرات 2 منهم رخمين وبعدهم مباشرة قطعة السلوك الاستهلاكي و التلوث يعني من الاخر بداية مبشرة خالص طبعا مفيش سؤال من القطعة كنت متأكد فيه من اجابتي وساعتها مكنتش بقرر واروح اللي بعده وخلصت القسم كله وقعدتلها اتخانق معاها وتقريبا بهدلت الدنيا فيها واتنقلت للقسم اللي بعده تقريبا كان كمي وفيه رسمات بيانية فظيعة عمري ماشفتها في مذاكرتي وبعد ما خلصت القسم رجعت تاني للقسم الاول عشان اراجع اجابات القطعة في خلسة أكيد ، ورحت الثالث وكان أسهل واحد واتبقى وقت كتيييير ورجعت تاني لأم القطعة الغبية مش عارف اقرر فيها حاجة خالص ، ورحت الرابع تقريبا كان فيه أخت ليها ساعتها قلت انا ادمرت واصابني الاحباط وكنت بحل وبقول مش هراجع اجاباتي بقا وكمان حسيت بالملل لطول الوقت وجه اخر قسم كان كمي حليته ع السريع كدا وكان فيه افكار حلوة وعشان مراجعتوش غلطت فيه غلطتين تافهتين وندمت لما عرف كدا واتضحلي في الاخر اني كنت ماشي صح لحد القسم الاخير الكمي وخرجت من اللجنة وقد رأيت البسمة على وجه أصدقائي وأخي وأنا المبتئس الحزين الوحيد ولما رجعت لقيت نفسي غلطت في تفاهات صغير في القطع وكانت اجابتي حلوة على عكس ما توقعته لبالفشل الذريع ، وذاكرت المدرسة لحد يوم النتيجة قعدت استنى فيها لحد 12 بليل وبعدين روحت نمت ، أمي جت صحيتني وقالتلي اني جبت 93 طبعا ذهلت من الرقم لاني فاكر اني مش معدي ال 88 بل ال 85 وفرحت جامد ولما دخلت يزيد لقيتا من أردأ الدرجات لمن في فئتي العمرية لما لقيت ناس كتير جايبة أعلى مني ، اتفجعت من الدرجة بعد فرح شديد وكانت كدا


وهكذا انقضى عصر الظلمة لي وبدأت على بياض او من الصفر
----------------------------
----------------------------

امتحنا نصف السنة وعدت الحمد لله وبدأت اجازة نصف السنة وابتديت مذاكرة القدرات اكني معرفش حاجة عنها وذاكرت ابدأ من هنا للمرة الرابعة وكملت بكار لاني مكنتش لحقت خلصت وذاكرت الفريدالبرتقالي و المعلم و المتميز و المميز و الفريد الاخضر والاستعداد ، باختصار كل الكتب المطبوعة ساعتها بس قدرت احدد من الصح ومين الغلط عن طريق رأي الاغلبية في الكتب وطبعا كل ملفات يزيد من اولها لاخرها في الكمي خلصتها واللفظي تقريبا 3/4 الملفات ساعتها تفرغت لحل التجميعات اللي كنت فاكرها في المرة الاولى ملهاش لازمة خالص وذاكرتها في المرة الاولى متأخر عشان كدا ملحقتش اخلص غير نصها تقريبا ومذاكرة اولية يعني مش مفيدة اوي وكمان برده قطع استيعاب المقروء في المرة الاولى مكنتش خلصتها كلها ، واتعملت من هذه الغلطة الشنيعة دي وحليت انا و العضو Ahmed 94 اغلب تجميعات اللفظي كان بيبدي رأيه وانا برده ولما نختلف كنا بنحط السؤال هنا ونتنظر لرأي الأعضاء عشان نتفق على حاجة ثابتة ومضت الايام لحد ما جالي وقت فيه كنت مضغوط بشكل فظيع (اختبارات المدرسة + القدرات + مريض) جالي ارتفاع بسيط في الضغط ومقدرتش اذاكر اسبوع كامل وانقطعت عن حل التجميعات مع أحمد بسبب المشكلة دي وابويا ساعتها قلي خف على نفسك شوية يا بني هتستفاد ايه لما تمرض وتجيب درجة حلوة في القدرات ، سمعت الكلام وسيبت المدرسة خالص خالص مبقتش اعرف ان فيه منهج بناخده اصلا وتفرغت للقدرات فقط ومضت الايام وزادت خبرتي في اللفظي بشكل موسع طبعا بعد الاستعانة بجهابذة القسم الذي وصلوا لل97 في ثالث مرة ليهم كنت حريص جدا على الاستفادة من خبرتهم وعلى رأسهم عمرو 2009 و kh-hamouda و se3ed tharwt و أبو أسامة طبعا معروفين لدى الجميع ، أحياناً كثيرة خالفوني الرأي ووضحولي نقاط ضعفي يعني زودوني بخبرتهم الواسعة على مدار 3 مرات واخويا طبعاً كان لي نصيب كبير برده في تزويدي بخبرته ، وانا كنت على اقتناع تام ساعتها اني افكر بلامنطقية + هجيب درجة مش اللي بحلم بيها + مستوايا مش ناوي يتغير ، بسبب اني لقيت اني بجاوب اسئلة كتير غلط في وقت المفروض اكون فيه بدي درس قدرات مش لسا هتعلم ، قلت لا بقا انا لازم افكر بشوية حكمة بدل التهييس اللي انا فيه طبعا كل الكلام راجع على اللفظي اللي كان محور تركيزي المرة دي ولم يتبقى لي الا القليل من ملفات اللفظي لم انته منها طنشتها وروحت ذاكرت ملف فيه(أسئلة قياس اللي تباع بالكارت) طبعاً أسئلة مستواها عالي في الكمي وفي اللفظي عجبتني صراحة ، ولا خلصتها فتحت موقع التدريب على الاختبار اللي عمله المركز صراحة موقع خرافي وأسئلة رائعة ، وبعدها بدأت بدري في تجميعات الكمي وخلصتها وذاكرت تجميعات اللفظي بالتوازي ويوم الاختبار جالي صداع قبل الاختبار لاني ذاكرت فيه كتير شوية وكان يوم الاتنين يعني مسائي ودخلت الاختبار وحالتي مغايرة تماما للمرة الاولى من حيث الثقة وعدم التردد والطمأنينة وبدأ الاختبار وللأسف نفس المراقب البطيء ونفس التصرفات وبدأنا تسجيل البيانات نتأخرين بسببه نفس المرة اللي فاتت بس في المرة دي تجنبت أخطائي جميعها اول قسم كان لفظي وفيه قطعة الرجولة 14 سؤال وكانت فوق المتوسط فيها اسئلة شائكة بردهوهتلاقوها في موضوع انا عملته في القسم اللفظي قبل كدا واللي بعده كان كمي ومستواه يميل للصعوبة الى حد ما وكملت الاختبار والحمد لله ولكن برده لما قابلت اسئلة في ك كتيرة حبطتتني بس قلت انا مش هعمل زي المرة الاولى واضيع نفسي واستمريت بنفس أدائي في القسم الأول وكنت براجع اجابات كل قسم بحله من حيث الحل ومن حيث التظليل يعني مرتين ولول في وقت أكتر بخليهم تلاتة ولو في وقت أكتر برجع للأقسام اللي ورا على السريع يعني كنت محافظ ع الوقت بشكل دقيق جدا جدا جدا ، ولو قابلت سؤال في شيء بسيط من التفكير بخليه واسيبه للآخر متبعاً قاعدة (اضمن كله وحل السؤال الصعب في الآخر) لان الصعب و السهل لهم نفس الدرجة ، وفي مراجعتي لتظليل القسم الاول وجدت نفسي مظلل سؤال في قطعة الرجولة عكس ما اخترت من الحلول وللأسف خلص الوقت قبل ما اصلح الغلطة غير المقصودة دي لان الذهن برده بيضعف مع التركيز الشديد وتقريبا بسببه جبت 99.8 في العربي أما الكمي فكنت واثق اني مغلطتش نهائي ولكن جت 99.8 الحمد لله على كل حال ، انا لما خرجت من الاختبار كنت متوقع 2 لفظي او 3 بكتير و صفر كمي وجت زي ما توقعتها تماما من ناحية عدد الغلطات ،، ومكنتش واثق من حسابي لعدد الغلطات عشان كدا قلت انا هجيب 96 او 97 لما زودت لنفسي عدد غلطات أكبر من اللي أنا غلطانهم اعتباراً بأسوأ الفروض وكانت النتيجة بالشكل التالي


فالشكر لله والحمد له وبه نستعين على شرور أنفسنا و مكائد الشياطين
أرجو منكم الدعاء لي بالهداية الدائمة
و 100 في اختبار التحصيلي - عساه لا يطبق علينا - .


أسألوني كما شئتم فخير الناس من تعلم العلم وعمل به و علّم غيره وسأجاوب بحكم تجربتي وليس شرطاً أن أكون موفقاً في الإجابة




احترت بين الاتنين صراحة





أسئلتكم:-
السؤال :- ماشاء الله لاقوووه الابالله
انا سؤؤؤؤؤالي انه باااقي بس 4 ايام ع اختباري وابي اجيب 90+ هل بتكفي ولا لا بس التجميعات وشكرا
الإجابة :- بكل تأكيد تكفي لأن الاختبار كله منها أصلاً
السؤال :-
اخوي مبرووووووك \كتاب بكار كم صفحة وهل شرح الاسئلة موجود وشكرااخ
الإجابة :- كتاب بكار كبير جدا جدا هو تقريبا 300 صفحة وفيه شرح لبعض الأسئلة مش كلها ، أنا اعتقد أنه لا يصح البداية به لأنه من يريد أن يذاكره يجب أن يتعدى المستوى فوق المتوسط ويكون ممتاز حتى يستوعبه بشكل صحيح لان مستواه صعب
فلا أنصحك بيه كبداية وانا اسمي عبدالله سعيد
السؤال :-
هووووف الحمد لله شكككككررررا لك ان شاء الله كافيه بس الوووووقتتت كييييف احلللل بسرررررررععععه؟؟؟؟
عذرا لو كانت طويلة هي ناقصة شوية الحقيقة ، الحل السريع يعتمد على التدريب وليس يوم وليلة ومن كتر الحل ممكن تحفظي السؤال باجابته كمان من غير ما تفكري فيه اصلا
السؤال :-
دلوقتي أنا قدامي 5 أيام على اختباري ومخلصة التجميعات ومجموعة كتب
تنصحني أركز في ايه الايام الجاية دول ؟
وأركز على أي تجميع .. لاني نآوية ارآجع التجميعات تاني ان شاء الله بس مش عآرفة أبدأ منين

الاجابة :- ابدأي التجميعات من الأقدم للأحدث يعني من 1430 ل 1433 لان الجديد بييجي منه بشكل أكبر من القديم وانصحك تعيدي مذاكرة التجميعات تاني ومتفتحيش غيرهم عشان باقيلك 5 ايام
السؤال :-
أنا لو راجعت الفارس 1+2 +المنهل + الفريد البرتقالي والاخضر وقريت التجميعات عشان تجميعات اللفظي غير الكمي ده كفاية للامتحان ؟؟؟؟
هل عندك القدرة على مراجعة كل دول في وقت قياسي زي الوقت ده !
كافيين جدا جدا جدا ولكن في الفارس (اكمال الجمل + معاني) فقط
ومعاني التجميعات أهم حاجة
السؤال :-
أنت قلت نراجع ابدأ من هنا أكتر من مرة بصراحة شايفة فعلا عندك حق
بس الكتب زي كتاب بكار خصوصا نراجعه يا تري أكتر من مرة ولا كفاية مرة واحدة؟؟؟؟
و أيه رأيك في كتاب الزهراني ؟؟؟؟
وبالنسبة للتجميعات بقي تنصحني أحلها دلوقتي ولا في الأخر بعد ما أخلص الكتب والملفات ؟؟؟؟

الاجابة :- ابدأ من هنا لازم يتراجع كتير لانه اساسيات وبتتنسي لما نتشغل عن القدرات مدة كبيرة ومحدش يقدر يكمل من غيره ، الزهراني أفضل الكتب زي بكار ولكن الزهارني قد تفوق في الشرح كثيرا كثيرا وفي الاعادة افادة يعني لما تراجعيه اكتر من مرة طبعا مش متعاقبة على فترات عشان منحسش بالملل وميكونش حفظ للكتاب ، تجميعات الكمي ابدأيها من الآن حتى تكوني عند يوم الاختبار حافظاها وفاهماها قد تستغربين من (حافظاها) لكن حفظ اجابات بعض الاسئلة لما تشوفيها أكتر من مرة وجالك في الاختبار هتحلي السؤال ولو طلع نفس الناتج هتكون واثقة وممكن متحتاجيش تراجعي السؤال ده عشان تفضي وقت لغيره
ملحوظة : الحكاية دي فادتني جدا في الاختبار
تجميعات اللفظي احرصي ان تكون الاخيرة في مذاكرة اللفظي ومشاورة الاعضاء في الحلول لانها مش محلولة ولو اعتمدتي فيها على نفسك لازم يكون عندك خبرة من كل ملفات يزيد عشان توفقي في الحل
السؤال :-
امممم دلوقتي الوقت بيجري بطريقة رهيييييييييييييييييبة ..
و اخطائي اخطاء غباء ..
جمع قسمة ضرب
ازاي اظبط ضياع التركيز في الامتحان .. و ازاي متوترش لو حليت سؤال بالبركة ..
و استيعاب المقروء اعمل معاه ايه انا حاسة انه هتيجي حاجة متكرر و اجيب نفس الدرجة الفاشلة فيه ..
انا مش بقتنع بالاجابات بسهولة و دي مشكلة اني بفضل اجادل مع نفسي في اللفظي ..
و الكمي ازااااااااااااااااااااي اركز فيه بشكل احترافي ..

الإجابة :- أنا في الواقع قبل الاختبار ب3 أسابيع كنت أخطأ في 72 سؤال في اثنين ، لم ؟ جمع + طرح + قسمة
تقريبا انتي نفسي تماما لان كل مشاكلك دي كانت عندي المرة الاولى وجزء منها المرة الثانية يعني ابشري ان شاء الله ، انا هتكلم عن طرق حل حلوة للاستيعاب في موضوع منفصل ، اشربي مية كتير قبل الاختبار عشان ميجيلكيش صداع زي ما جالي اول ما شربت مية حسيت اني فوقت و الصداع راح ، لن تقتنعي باجابة اي سؤال الا ان تثبتي خطأ باقي الاجابات فاسعي وراء ايجاد اسباب بطلان ثلاث اجابات لترجح الرابعة يعني حاولي تدوري في القطعة على حاجة تثبت بطلان اجابة من الاجابات وبعدين شوفي الانسب من الباقي ، ولا تزال مشكلة التركيز عندي الى الان والحل الوحيد الاحترافية في سرعة الحل عشان تراجعي كل الاسئلة ، وحكاية متوترش دي تعتمد عليكي لازم تعرفي ان لو سؤال غلطتي فيه عادي في سبيل انك تركزي في الباقي ، متتوتريش من اي سؤال حتى لو مش عارفه الاجابة ، المهم طبقي نظرية (اضمن كله وبعدين حل الصعب)
ودي كانت نصيحة أستاذ محمد هنداو لما سألته عن التركيز:-
أهم الأشياء التي تزيد من تركيزك اولا النوم جيدا ليلة الاختبار
ثانيا تناول مواد كربوهيداتية من موز لشوكلاتات لعصيرات قبل الاختبار بساعة
ولا تذهب للاختبار والمعدة خاوية
ثالثا واهم شىء هو الاستعداد للاختبار
فكلما أحس الطالب بأن حلولة صحيحة
وانه مع مرور الوقت تحل عدد من الأسئلة
تتناسب مع الوقت المنصرم تشعر بخماس ويزيد تركيزك
رابعا يجب ان تعيش تجربة الاختبار مرة أو مرتين باختبار تجريبي شامل يحاكي الاختبار الفعلي
خامسا دائما تؤخذ شهيق وزفير كبير حتي تعطي المخ الاكسجين المطلوب
السؤال :-
لما أحل تجميع ما, أعيدو من جديد !
ولا مايحتاج ! يعني مثلا 25 سؤال .. سؤالين احتجت تذذكير بالطريقه .. وسؤال ماعرفتو بس,

وسؤالين غلط

الاجابة :- لا ما تعيدي لان التجميعات ناقلة كلها من بعضها هتلاقي تقريبا ال 25 سؤال دول الف مرة في التجميعات
السؤال :-
ماشاء الله تبارك الله الف مبروك تجربه رائعة ومشرفه انا استفدت منها كتير وكنت مستمتعه جدا وانا بقرائها بس انا خايفه من القدرات لاني تعليم سعودي وكمان لسه باديه في القدرات اليومين دول تعتقد من دلوقتي لتلته اقدر اكون سريعه في الحل وكده ولااتاخرت؟وشكرا
الاجابة :- لا متأخرتيش الوقت كافي وجداً بس لازم تستغلي الاجازة بشكل فعال في مذاكرة القدرات
السؤال :-
كيف اطور نفسي باستيعاب المقروء؟
هنا بعض ما يساعدك
وهنا المزيد من شرح أستاذنا العظيم محمد عقيل
العلاقات في استيعاب المقروء من اعداد جود مان
التقدم في الاستيعاب لبرنس عمر
استيعاب المقروء من اعداد مهاب
وان استطعت سأفتح موضوع بهذا الشأن
السؤال :-
طيب التجميع يكفي نذاكر منو لانو التجميع عندي من سنه 1430
الاجابة :- بما ان الوقت قد أزف فليس لك سواه ، يكفي في الكمي بأكثر من 100% أما اللفظي فيحتاج مراجعة الملفات و الكتب لانه غير محلول
السؤال :-
ملقتش صعوبه في اختلاف الارقام بالعربي وكده مش منهج تاني مطور برضه
الاجابة :- اه انا في تاني منهج مطور بس كان في يوم واحد من ايام فترة الاختبار هوا اللي كان بالانجليزي وانا اختبرت يوم الاثنين (بالعربي) ، السنة الجاية بحكم ان ثاني وثالث هيكونوا مطور ممكن يكون الاختبار بالانجلش ويارب ده ميحصلش ، ليست لدي صعوبة في التعامل مع أرقام الانجليزي ولكن كتابتها تاخد وقت أطول
السؤال :-
تفتكر لو ذاكرت التجميعات بس تمام اوصل لـ 99%ولا صعبه
الاجابة :- مفيش أمل يتحقق غير بالعزيمة و الاصرار ، على حسب مستواك لو كويس في الكمي تجيب +98 لو اكتفيتي بالتجميعات ، لكن اللفظي مينفعش تكتفي بالتجميعات أبدا أبدا
السؤال :-
انا باقي لي اختيارين ماختبرتهم ، هل بامكاني اختبرهم وانا متخرج
الاجابة :- أكيد وده على حسب مذاكرتك
السؤال :-
{ اكيد من درجاتي مستواي سيئ جداً وضئيل ، من فين ابدا ، وفين انتهي وبـ اي كتاب ابداء } { وانا لو بارادتي بس ابغى مابين 75 الى 80 } لانها تفيدني هنا بعد الله وتدخلني الجامعه
الاجابة :- سأفتح موضوع قريباً فيه خطة طريق للمبتدئين












التوقيع :
__


كُل ما أطلبهُ مِنكم دعاءُ في ظهرِ الغيَب ..
مِن أجل تحقِيق ما أطمحُ إليهَ ..
فكُل ما قدمتهُ لكمَ .. كانَ مِن " حُب لأخِيك ماتحبُ لنفسِك "

* قال رسول الله صلى الله عليه وسلم : ما من عبد مسلم يدعو لأخيه بظهر الغيب إلا قال الملك : ولك بمثل . .

* و اللهُ وليُ التوفِيق . .

__ حسابي بالـ ask ..

'♥ http://ask.fm/d_harten ‹‹

موضوع مغلق

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع



الساعة الآن 10:57 AM

mobile:0506390987 للإعلان في الموقع واتس : aboyzed_rhotmail.com
مايطرح في المنتدى لايعبر عن رأي الإدارة وإنما رأي الكاتب

  


Powered by vBulletin® Version 3.8.11
Copyright ©2000 - 2018, vBulletin Solutions Inc.
التصميم بواسطة : سعودي لاير ©