منتديات يزيد التعليمية


عذراً سياسة المنتدى تمنع وضع الموسيقى ووضع الصور النسائية في التواقيع والمواضيع والصور الرمزية والشخصية


العودة   منتديات يزيد التعليمية > منتديات قياس ( qeyas ) > ما بعد اختبار القدرات العامة والتحصيلي > المسارات التحضيرية

إضافة رد
 
أدوات الموضوع انواع عرض الموضوع
قديم 06-01-2016, 02:11 PM   رقم المشاركة : 1
Somayya
عضو سوبر





الحالة
Somayya غير متواجد حالياً

 
Somayya يستحق التميز


 

"تجربتي" في السنة التحضيرية - المسار الصحي - لجامعة أم القرى




صباح الخير أيها الجميلون كيف حالكم وإيش عاملين مع القبول والتسجيل ؟

لاحظت انه كثيير منكم حايسين لذلك ح احاول اكتب كل الجوانب اللي اتطرقتلها في هادي السنة بإذن الله


السنة التحضيرية الطبية تعتبر ميزة وشي طيب لأنها بتهيئنا للتخصص الطبي اللي نبغاه .. بس والله كرف مزبوط < عمري ما انكرفت كدا

لذلك من وجهة نظري اشوف انه السنة التحضيرية بكبرها عباره عن اختبار .. والناجح فيه هو اللي يقدر يجيب درجات رغم كل الضغوطات اللي حيتعرضلها .

ح اكتبلكم كيف كنت اذاكر لكل مادة .. وطبعا طريقة المذاكرة تختلف من شخص لآخر


- الترم الأول :
الترم الأول جدا سهل وبنات كثيير جدا جابوا الـ4 (المعدل الكامل)عددهم كان 153من أصل 800 بنت " أعتقد أكثر من كدا عدد بنات الدفعة " وعملولهم تكريم وحركات وكدا أما الأولاد كانوا 70 تقريباً اللي جابوا المعدل الكامل .
أولا : اختبار تحديد المستوى :
اختبار تحديد المستوى هو اختبار يحدد مستواك واذا جبت المستوى الرابع تاخذ اعفاء يعني تنزلك المادة في المعدل بـ A+ بدون ما تدرسها
لكن اتلغى للأسف السنة دي < ضاعت اجازتي وانا اذاكر واستعد له

المواد وعدد ساعاتها :

1- اللغة الانجليزية : 6 ساعات في المعدل .. أكثر المعدل يعتمد عليه لذلك حاولوا قد ما تقدروا تجيبوا فيه الـ A+ .
المنهج عبارة عن كتابين من كتب headway اول كتاب كان مستوى elementary و كان جدا سهل وتافه , أما الكتاب الثاني كان مستوى pre-intermediate وكان اصعب من اللي قبله شويا < مو صعب لكن أصعب من اللي قبله افهموها انتو عاد
- طريقة مذاكرتي له :
الكتاب الأول بصراحة ماكنت اذاكره لأنه كان جدا جدا سهل وكل الكلمات اللي فيه غالبا كنت عارفتها, أما الكتاب الثاني كان أصعب شي فيه القرامر وكنت أفتح في اليوتيوب على شروحات للقرامر .

الاختبارات :
الاختبارات عندنا بشكل عام تنقسم لـ 3 أقسام (كل المواد اختباراتها وكويزاتها بالانجليزي ماعدا مادة مهارات التعلم):
1- اختبارات قصيرة "quiz".
2- اختبار منتصف الفصل "med-term".
3- اختبار نهائي "final exam".

اللغة الانجليزيه كويزاتها تختلف من استاذه لأستاذه من ناحية الأسئلة ومن ناحية عدد الوحدات الداخلة في الكويز .. يعني مثلا استاذتنا اختبرتنا أول مره 5 وحدات واستاذة الشعبة الأخرى اختبرت بناتها وحدة واحدة بس .
أما الميد ترم اختبرنا فيه كتاب elementary وكان الاختبار فترتين يعني مثلا 15 شعبة تختبر أولا وبعدين 15 شعبة تختبر بعدهم . كان اختبار الفترة الأولى جدا سهل وكثييير جابوا الدرجة الكاملة .. أما اختبار الفترة الثانية يُقال إنه كان صعب وقليل جدا اللي جابوا الفل مارك , ولما جيت أسأل صحباتي عن درجاتهم كان أغلبهم ناقص 5 درجات وفوق .
أما في الفاينل شعبتنا كان اختبارها في الفترة الثانية .. وكنت قبل ما أدخل الاختبار اشوف البنات مبسوطين ويقولولنا سهل مرررة وياريتنا ما ضيعنا عليه وقت .. الخ , لكن اتفاجئنا إنه الاختبار كان صعب والله !

2- الكيمياء الحيوية "bio " : ساعتين في المعدل .. مالها كويزات ولها جزء عملي , أنا أخذت البايو عند استاذة خصوصية واللي كان لها الفضل بعد الله سبحانه اني اجيب الـ A+ .. بصراحة كان المنهج سهل .. اختبار الميد كان سهل نوعا ما, أما الفاينل كان فيه لغوصة والله دخت من الأسئلة وسرت اعلي صوتي عشان استوعب السؤال إلين سكتتني المراقبة
طريقة مذاكرتي له : أقرى السلايدات وأي كلمة ما أفهمها اترجمها وما أنتقل للسلايد اللي بعده إلا بعد ما أفهم السلايد اللي قبله لأنه كل شي مرتبط ببعضه .
أما الاختبار العملي كان حوسة واخذت تجربة كنت غايبة فيها لكن الحمد لله كان سهل نوعا ما < بغض النظر عن القربعه اللي سويتها في المعمل
3- الوراثة "genetics" : دي المادة مررررة كنت احبها كانت ممتعة ومعلوماتها سهلة وهي ساعتين في المعدل .. مالها كويزات لكن الميد والفاينل كانو سهلين ولله الحمد .
طريقة مذاكرتي له : نفس طريقة مذاكرتي للبايو .

4- الحاسب : ساعتين في المعدل ..كان المنهج دسم وكلامه كثير .. لكن سهل برضو وله جزء عملي .
الاختبارات :
الكويزات : اختبرنا تقريبا 5 أو 6 كويزات .
الميد ترم والفاينل : سهلين .
الاختبار العملي : كان سهل ويختلف من أستاذة لأستاذه .
طريقة مذاكرتي له : ما كنت أذاكرله لأني كنت مركزة جدا مع الأستاذة وادون أي شي ممكن يوضح الشرح , كنت اذاكر فقط قبل الكويزات وطبعا ذاكرت للميد والفاينل بنفس طريقة مذاكرتي للبايو .

5- مهارات التعلم : المادة اللي مال ام امها داعي .. ولها 3 ساعات في المعدل .
كان لها كويز واحد فقط وما عليه درجات .. لكن أنشطة المادة كانت كثيرة شويا .
المادة مالها اختبار ميد ترم .
الفاينل كان سهل وتااافه ومال أمه داعي .
طريقة مذاكرتي له :
أول شي أقرأ الوحدة كاملة وبعدين أأشر ع الأشياء المهمة واحفظها .
التعريفات كتبتها كلها في ورقة < طريقة ممتازة بالنسبالي في الحفظ ولكن تضيع وقت .

الأساتذه :
-اللغة الانجليزية :
أول مرة درستها مع مس هيفاء شاطرة وطيبة وعسل وكل حاجة جمييلة في الحياة
وبعد ما اتلغت شعبتنا درستها مع مس شيماء صديقي برضها شاطررة جدا اللهم صلي ع النبي وطيبة وعسل وكل حاجة جميلة في الحياة (( طيييييييبة وتراعي مررررة ربنا يسعدها ويوفقها )) .
-البايو :
دكتورتين درسونا :
1- هبة عدلي/ شرحنلنا جزئية الكربوهيدرات ( شاطرة لكنها سريعة مرررررة وعصبية ) .
2- فاطمة / شرحتلنا باقي المنهج (سريعة مررررررررررررررة لكن لو ركزتي معاها حتفهمي )
البايو العملي :
درستنا الدكتورة نازك الطيب ربي يطيب أيامها مررررررررة طيبة وتفهم .
- الجينتكس :
1- درستنا أستاذة اشواق الجهني ( شاطرة وفاهمة اللي بتشرحه , تسوي نفسها شريرة شوية لكنها طييبة وكيوت وكل حاجة جميلة في الحياة < للأسف اكتشفت هذا الشي نهاية الترم .. بصراحة مو كل المحاضرات كنت افهمها معاها لذلك كنت احتاج اذاكر مذاكرة مكثفة وطبعا ما كان عندي مانع لأنها كانت مادة ممتعة )
2- الدكتور نداء بوقري درسنا محاضرتين او 3 ( شاطر جدا ويفهم واسلوبه في الشرح جميل , أغلب المحاضرة تروح في الضحك )
- الحاسب :
درستنا أستاذة بثينة كيوووت جدا وتفهم إذا ركزتي معاها .. حصلي موقف معاها في بداية الترم في مرة مرت علي كلمة وما فهمتها وسألتها عنها وجاوبتني وبعدين سألتها عن جزئية وبرضها جاوبتني وبعدين وقفت وقالت : هادي البنت شاطرة ومركزة معايا على طول خليكم زيها ومن قتها وانا ما اقدر أرخي نشاطي معاها ( أغلب الفصل ما كانوا يفهموا معاها و البعض احتج بلهجتها السودانية )
- مهارات التعلم :
درستنا استاذة ندى خراشي وكانت أطيب شي في الحياة وتفهم وتراعي كثييييييييير وتساعد مره ربي يسعدها .

حاولوا قد ما تقدروا تسألوا عن دكاترتكم بداية الترم وكيف اسلوبهم عشان لو لا سمح الله رحتوا مع استاذه شريره ( تخسف وما تراعي ) تحاولوا تحولوا لشعبة تانية .

و كدا نكون خلصنا الترم الأول .. ولله الحمد

ح أكتب تجربتي في الترم الثاني اليوم أو بكرا بالكثير باذن الله .. انتظروني






آخر تعديل Somayya يوم 06-01-2016 في 02:24 PM.

رد مع اقتباس
قديم 06-01-2016, 02:28 PM   رقم المشاركة : 2
سمو ،
ربّ زدني علماً
 
الصورة الرمزية سمو ،





الحالة
سمو ، غير متواجد حالياً

 
سمو ، عضو مبدع لامحالةسمو ، عضو مبدع لامحالةسمو ، عضو مبدع لامحالةسمو ، عضو مبدع لامحالةسمو ، عضو مبدع لامحالةسمو ، عضو مبدع لامحالةسمو ، عضو مبدع لامحالةسمو ، عضو مبدع لامحالةسمو ، عضو مبدع لامحالةسمو ، عضو مبدع لامحالةسمو ، عضو مبدع لامحالة


 

رد: "تجربتي" في السنة التحضيرية - المسار الصحي - لجامعة أم القرى




اقتباس:
بس والله كرف مزبوط < عمري ما انكرفت كدا
أنا مؤمنة إني مارح أقول هالعبارة أبداً لأن كرفي فالثانوي كان ضخم ، والسبب طبعاً مدرستي السيئة


تدرين لاحظت شيء مهم فيك ، إنك داخلة الجامعة بحب ورغبة !
وهذا الشيء انعكس بشكل إيجابي جداً عليك وعلى آرائك ..

مثلاً وصفك لأساتذتك ، أغلب الناس لما يكون مع أستاذ شرحه سريع/عصبي/نايم
يطنش الحصة/المحاضرة ويخلي السبب كله فراس الأستاذ طبعاً أحياناً الطلاب يكون معاهم حق بس أحياناً الظروف تجبرك وما تقدر تسوي شي ! فمالك إلا تتقبل وتركز

مرة أعجبتني روحك الإيجابية الله يسعدك بالتوفيق ومنتظرة التكملة






التوقيع :

رد مع اقتباس
قديم 06-01-2016, 08:02 PM   رقم المشاركة : 3
Somayya
عضو سوبر





الحالة
Somayya غير متواجد حالياً

 
Somayya يستحق التميز


 

رد: "تجربتي" في السنة التحضيرية - المسار الصحي - لجامعة أم القرى




اقتباس:
المشاركة الأصلية كتبت بواسطة سمو ، مشاهدة المشاركة

أنا مؤمنة إني مارح أقول هالعبارة أبداً لأن كرفي فالثانوي كان ضخم ، والسبب طبعاً مدرستي السيئة


تدرين لاحظت شيء مهم فيك ، إنك داخلة الجامعة بحب ورغبة !
وهذا الشيء انعكس بشكل إيجابي جداً عليك وعلى آرائك ..

مثلاً وصفك لأساتذتك ، أغلب الناس لما يكون مع أستاذ شرحه سريع/عصبي/نايم
يطنش الحصة/المحاضرة ويخلي السبب كله فراس الأستاذ طبعاً أحياناً الطلاب يكون معاهم حق بس أحياناً الظروف تجبرك وما تقدر تسوي شي ! فمالك إلا تتقبل وتركز

مرة أعجبتني روحك الإيجابية الله يسعدك بالتوفيق ومنتظرة التكملة
اممم ايش الكلام الحلو دا ما اعرف ايش اقول 😂😂
ويسعدك يا قلبي ويوفقك .. وباذن الله ح اكلمها بالشكل اللي يرضيكم






رد مع اقتباس
قديم 06-01-2016, 09:00 PM   رقم المشاركة : 4
Mawaddah.
عضو متألق
 
الصورة الرمزية Mawaddah.






الحالة
Mawaddah. غير متواجد حالياً

 
Mawaddah. يستحق التميز


 

رد: "تجربتي" في السنة التحضيرية - المسار الصحي - لجامعة أم القرى





والله تجربتك وكلامك جدددا جميل ومريح
ومثل ما قلت سمو " داخلة الجامعة بحب ورغبة ووصفك للدكاترة " > يعني نادراً نلقى أحد يمدح بأساتذة الجامعة ومتحملهم
الله يسعدك حمستيني والله
بانتظار التكملــــــــة
وعندي سؤالين ؟
الحين اكيد الغو اختبار المستوى وكلنا نصير ندرس نفس المستوى ؟
+ سمعت ان من السنة الجاية "ما ادري يقصدوا دفعتنا " انو راح يتغير النظام بالكامل ويصير نظام الماني








التوقيع :

.
.
.


< ربنا آتنا في الدنيا حسنة وفي الآخرة حسنة وقنا عذاب النار >

رد مع اقتباس
قديم 06-01-2016, 10:55 PM   رقم المشاركة : 5
Somayya
عضو سوبر





الحالة
Somayya غير متواجد حالياً

 
Somayya يستحق التميز


 

رد: "تجربتي" في السنة التحضيرية - المسار الصحي - لجامعة أم القرى




اقتباس:
المشاركة الأصلية كتبت بواسطة Mawaddah. مشاهدة المشاركة

والله تجربتك وكلامك جدددا جميل ومريح
ومثل ما قلت سمو " داخلة الجامعة بحب ورغبة ووصفك للدكاترة " > يعني نادراً نلقى أحد يمدح بأساتذة الجامعة ومتحملهم
الله يسعدك حمستيني والله
بانتظار التكملــــــــة
وعندي سؤالين ؟
الحين اكيد الغو اختبار المستوى وكلنا نصير ندرس نفس المستوى ؟
+ سمعت ان من السنة الجاية "ما ادري يقصدوا دفعتنا " انو راح يتغير النظام بالكامل ويصير نظام الماني


ويسعدك ياقلبي دنيا وآخرة العام الماضي كنت كل يوم افتح المنتدى والفيس وتويتر أبا اشوف أي شي يحمسني للجامعة لأنه وبصراحة انا كانت رغبتي الأولى أرامكو " هندسة مدنية " وما تيسر القبول بعد ماكنت على قائمة الانتظار .. والحمد لله على كل حال .. اللي ساعدني اني كنت عاملة لنفسي قائمة بحيث اني لو لا سمح الله ما انقبلت ارامكو حابة اخش طب ولو ما خشيت طب حابة اخش تغذية ... وهكذا . سوو كدا انتو كمان عشان لو لا سمح الله ما انقبلتوا في التخصص اللي تبغوه يكون تأثير الصدمة خفيف وتتقبلوا الأمر وكلكم رضا

بالنسبة للأسئلة :
- إيوا اكيد اتلغى وكلكم حتدرسوا من نفس المستوى اللي هو elementary
- لا اللي اعرفه ومتأكدة منه إنه النظام الألماني ( مدري هو ألماني ولا ايش اهم شي انه من الدول البرانية XD ) خطة دراسة البنات المقبولين في الطب والجراحة للسنة الجاية حتى سوولنا اجتماع وجات حرمة تفهمنا نظامهم للسنة الجاية " الاجتماع كان للطالبات اللي جابوا معدلات علي يعني 4 و 3.96 "






آخر تعديل Somayya يوم 06-01-2016 في 11:20 PM.

رد مع اقتباس
قديم 06-02-2016, 01:05 AM   رقم المشاركة : 6
Somayya
عضو سوبر





الحالة
Somayya غير متواجد حالياً

 
Somayya يستحق التميز


 

رد: "تجربتي" في السنة التحضيرية - المسار الصحي - لجامعة أم القرى




الترم الثاني

الترم الثاني هو الصفاية اللي حتصفي الطلاب والطالبات فعلًا

بصراحة شديدة .. هو أصعب من الترم الأول والضغط فيه أكبر .. لذلك لازم المذاكرة تكون مكثفة .
الترم الأول جبت معدل عالي ولله الحمد وهذا الشي حمسني جدًا للترم الثاني

بالنسبة للمعدل الكامل .. الى الآن ما شفت ولا بنت قالت انها جابت الـ 4 .. لكن حطوا في بالكم إنها ماهي مستحيلة وممكن تجيبوها لو سمعتوا كلامي باذن الله

1- اللغة الانجليزية " nursing " : مادة جدا جميلة وممتعة واللي من جد تحسسك أنك داخل تخصص طبي .. 4 ساعات في المعدل .. وهو كتابين nursing1 and nursing 2 من وجهة نظري كان الكتاب الأول يعتمد اعتماد كلي على الفوكابلري .. القرمر كان مكرر وقديم ونفس حق headway .
أما الكتاب الثاني كان الفوكابلري فيه مضاعف وكان فيه اختصارات كثير والقرامر كان جديد أو حاجة قديمة مزودين عليها أشياء جديدة
الكويزات : طريقة استاذتنا كانت بعد كل وحدة نختبر كويز وهادي الطريقة جدًا كويسة حاولوا تطلبوها من أساتذتكم .
طريقة مذاكرتي له : في البداية لاحظت انه في كلمات كثيره ماكنت فاهمتها ف أستأذنت من الأستاذة إنّي افتح جوالي وأترجم أو أفتح واحد من الكمبيوترات اللي في القاعة واترجم عليها أو اجيب التابلت حقي .
ف أي كلمة ما أفهمها كنت أأشر عليها أو أكتبها سواء كانت الكلمة في الريدنق أو اللسنينق أو في أي مكان من الدرس وبمجرد ما ألاقي فرصة " زي مثلا تسكت الأستاذة أو تخرج , تشرح معلومة سابقة , تتحدث بأحاديث جانبية " افتح المترجم واترجم .
في الميد ترم اختبرنا الكتاب الأول وكان الاختبار سهل بالنسبالي ولله الحمد لأني كنت اذاكر الكلمات أول بأول - لكن كانوا البنات شايفينه صعب والمنسق اعترف بصعوبة الاختبار ووعدنا إنه النهائي مح يكون صعب كدا .
الفاينل اختبرنا فيه الكتاب الثاني : تعبت وأنا أذاكره لكن حصدت ثمار تعبي في المعدل ولله الحمد .. الكلمات ذاكرتها أول بأول لذلك مو مرة تعبت فيها .. اضطريت اسحب على مذاكرة النيرسنق في نهاية الترم لذلك كانت مذاكرتي مكثفة للفاينل .. لأني هادي المرة ذاكرت القرامر من قلب لأنه كان جديد عليا وواجهت صعوبة في فهمه من الأستاذة ففتحت في اليوتيوب على شروحات لكل قرامر كمان قرأت محادثات الليسننق كلها وذاكرت حاجة اسمها الـ glossary فيها أغلب الكلمات بس برضو لازم تذاكروا أول شي من الدرس نفسه بعدين بعد ما تخلصوا تروحوا للقلوسري .

وفي كتيبات صغيرة كمان عليها 5 درجات بونس تنضاف على الدرجة النهائية " فرصة ذهبية " .. كانت طريقة استاذتنا هي انه كل بنت تشرح الكتاب اللي معاها بحيث تشمل كل مواضيع الكتاب في مدة لاتزيد عن 10 دقايق ولا تنقص عن 5 دقايق .

2- الكيمياء الحيوية "bio" : ساعتين في المعدل .. المنهج أتعمق في نفس مواضيع منهج الترم الأول بالإضافة لكم محاضرة جديدة .
طريقة مذاكرتي له : نفس طريقة مذاكرتي للبايو في الترم الأول .
الميد ترم كان سهل ولله الحمد لكن الدكتور سوّا حركة ضايقتني شوية وهي انه حط 3 أو 4 أسئلة مرتبطة ببعض أو إن صح التعبير تعتمد على بعض , يعني مثلا رسمة وعليها سؤال يقول ايش هذا المركب والسؤال اللي بعده يقول ايش الرابطة اللي حيكونها هذا المركب والسؤال اللي بعده يقول ايش صيغة هذا المركب وكدا .
أما الفاينل كان صعب بصراحة ويبغاله تركيز وتفتيح مخ ومذاكرة من بدري .. مهو مستحيل الحل

3- علم وظائف الخلية " physiology " : بـ3 ساعات في المعدل .. مادة جدًا سهلة وممتعة مالها كويزات ولها جزء عملي , لكن عيبها الوحيد إنها تعتمد على الحفظ بشكل كبير
طريقة مذاكرتي له : نفس طريقة مذاكرتي للبايو ولكن بما أن المنهج كان فيه دورات كثير فكنت أرسمها أو احاول ألخصها في ورقة صغيرة وادبسها في المحاضرة " كنت اسوي هادي الطريقة في أي مادة يكون فيها جزئية صعبة أو كلام كثير وساعدتني مرررة في المذاكرة للاختبار الفاينل أو الميد " كمان أستعنت بمذكرات - ح أذكركلكم إسمها لاحقًا .

4- البرمجة : 3 ساعات في المعدل .. بصراحة المادة مدري ايش دخلها في مجالنا الطبي بس يلا مشي حالك .. تتكلم البرمجة عن لغة الكمبيوتر وكيف تحولها للغة البشر ولغة المهندسين والعكس , لها جزء عملي على برنامج c++ .
طريقة مذاكرتي له : ما كنت أذاكر له إلا وقت الكويزات والميد والفاينل .. كان في مذكرة للمنهج ذاكرت منها وكان في سلايدات ذاكرت منها برضو .. ومراجعتي كانت من المذكرة لأنها تحتوي على أمثلة وكلام أوضح .
الكويزات كانت 4 كويزات .. الميد كان سهل مره وبنات كثير جابوا فيه الفل مارك لكن الفاينل أنا كنت شايفته متوسط السهولة لكن في بنات كثير خرجوا وهما زعلانين وطلبوا من المنسق يعطينا بونس ووو حوسة .

5- الفيزياء الطبية : نجي عند أهم مادة .. بـ 4 ساعات في المعدل وهي فعلًا اللي صفّت أغلب الطلاب والطالبات .. المادة لها كويزات .. وواجبات وجزء عملي .
أنا أخذتها عند أستاذ خصوصي أتعب وأنا أقول شاطر صلاتي ع النبي .
طريقة مذاكرتي له : كنت اذاكر من أوراق الأستاذ اللي أغنتني وبشكل كامل عن شراء كتاب المنهج أو السلايدات , كنت أتدرب برضوا على موقعهم في حاجة اسمها self - test .
اختبار الميد والفاينل كانوا جدًا تافهين بالنسبالي وبالنسبة للي بيدرسوا عند نفس الخصوصي تبعي ..
في طريقة معينة لاحتساب درجات الميد والفاينل وهي السبب الرئيسي في تصفية الطلاب وهي إنه السؤال الواحد كان بـ 1.6 وبعد التقريب بدرجتين .. لذلك سووا كل اللي تقدروا عليه عشان تحصّلوا درجات .

الأساتذة :
- النيرسنق :
مس هيلاري أو " عائشة بنت ديفيد " كما تُحب أن تُلقب .. أتعب وانا اقول انها طيبة وعسل ورائعة وخطيرة ورهيبة وكل ماهو لذيذ وطيب .. شاطرة و تعرف مصلحتنا أكثر من نفسنا
- البايو :
1- درستنا دكتورة نازك الطيب أول محاضرتين .
2- الدكتورة فاطمة شحات .
3- الدكتورة إيناس (تفهم وطيبة ) .
-الفسيولوجي :
درستني دكتورة انعام اللي من جد أعتبر نفسي محظوظة جدا إني درست عندها .. والله يا بنات شاطرة بشكل صلاتي عالنبي .. حالفة يمين تدخل المعلومة في راسك يعني تدخل ( تعصب اذا أحد هرج أو انشغل بالكتابة أو أي شي لازم تكوني معاها , لكنها طيبة وحنونة ربي يسعدها ) .
الفسيولوجي العملي :
درستني الدكتورة وصال .. ( طيبة وشاطرة لكنها حساسة شويا XD ) .
- البرمجة :
1- أستاذة منال ( ما درستني إلا محاضرة واحدة وكانت شاطرة ) .
2- أستاذة نوف العقل أظن كدا اسمها ( شاطرة وتفهم واسلوبها في الشرح سهل وطيبة .. لكنها مو مرة متداخلة مع الطالبات )
3- درستنا أستاذة حميراء ( شاااااطرة تبارك الرحمن لكن بصراحة مو مرة كنت أفهم عليها ) .
- الفيزياء الطبية :
1- درستني الدكتورة روبينا سليم ( أطيب أستاذة قابلتها في السنة التحضيرية مرررررررة كيوت وعسل وشااااااااطرة تقريبا بنفس مستوى أستاذي الخصوصي .. كانت طيبة وتحبنا وحالفة يمين تخلينا نجيب الفل مارك في كل الاختبارات والواجبات ) .
2- دكتورة أحلام بوسعيد ( شاطرة وتفهم ) .
وكدا نكون خلصنا الترم الثاني .. يارب تكونوا أستفدتوا وح أحاول ادخل المنتدى دايما عشان أشوف أحوالكم

حاجة أخيرة .. ولازم تفهموها كويس وهي انه المذاكرة مو شي صعب .. ممكن تطفش .. لكن كل واحد مننا يعرف إيش اللي يحمسه صح ؟ شدّوا حيلكم وأوصلوا لأحلامكم بجدارة كونوا أقوياء لا تتحطموا بمجرد ما تنقصوا .. بالعكس خلوه حافز لكم عشان تجيبوا درجات في الاختبار اللي بعده .. أهم شي أنكم تكونوا أقوياء وما تستسلموا بسهولة

ح اكتبلكم كل الروابط اللي ممكن تساعدكم بإذن الله بالإضافة الى أسماء الأساتذة الخصوصيين .






آخر تعديل Somayya يوم 06-02-2016 في 01:25 AM.

رد مع اقتباس
قديم 06-02-2016, 01:36 AM   رقم المشاركة : 7
Somayya
عضو سوبر





الحالة
Somayya غير متواجد حالياً

 
Somayya يستحق التميز


 

رد: "تجربتي" في السنة التحضيرية - المسار الصحي - لجامعة أم القرى




قروب الدفعة على الفيس بوك :
https://www.facebook.com/groups/1004030512961141/
مدونة رحمة العيسى :
uniquyeear.wordpress.com
مبادرة بنيان على تويتر :
https://twitter.com/Bunyan_2016
فيديو رائع لازم تشوفوه (جزئين):
1- https://www.youtube.com/watch?v=S8gyXn_AEno
2- https://www.youtube.com/watch?v=EHhVeX8RkqM
تجربة خطيرة ورهيبة قرأتها السنة اللي فاتت :
http://www.yzeeed.com/vb/showthread.php?t=275922
مذكرة الفسيولوجي اخذتها من مكتبة الأسرى للدكتور ربيع " ما تغني عن السلايدات " .
البايو درسته عند أستاذة سهير - تدرس فسيو وجينتكس كمان .
الفيزياء أخذتها مع أستاذ تامر .
+ أرقامهم حتلاقوها في مدونة رحمة .







رد مع اقتباس
قديم 06-02-2016, 02:21 AM   رقم المشاركة : 8
y333
عضو منا وفينا





الحالة
y333 غير متواجد حالياً

 
y333


 

رد: "تجربتي" في السنة التحضيرية - المسار الصحي - لجامعة أم القرى




الله يسعدك ويوفقك ويحققلك اللي تتمني❤️❤️







رد مع اقتباس
قديم 06-02-2016, 11:03 PM   رقم المشاركة : 9
Somayya
عضو سوبر





الحالة
Somayya غير متواجد حالياً

 
Somayya يستحق التميز


 

رد: "تجربتي" في السنة التحضيرية - المسار الصحي - لجامعة أم القرى




اقتباس:
المشاركة الأصلية كتبت بواسطة y333 مشاهدة المشاركة
الله يسعدك ويوفقك ويحققلك اللي تتمني❤❤
ويسعدك ياقلبي واياكِ يارب






رد مع اقتباس
قديم 06-03-2016, 01:26 PM   رقم المشاركة : 10
Mawaddah.
عضو متألق
 
الصورة الرمزية Mawaddah.






الحالة
Mawaddah. غير متواجد حالياً

 
Mawaddah. يستحق التميز


 

رد: "تجربتي" في السنة التحضيرية - المسار الصحي - لجامعة أم القرى




والله انبسطت انك كملتي التجربة
فعلا الترم الاول كان يبين لكم ان الجامعة سهله ، وجاء الترم الثاني
> يا ريت تحطي مواقع للتواصل اذا ما راح تكوني موجودة هنا دايم
عندي كم سؤال
الحين النظام الالماني ما راح يطبق على السنة التحضيرية
+ افتكر بأم القرى كان فيه مسار صحي - علمي - انساني ، ودخلت الموقع لقيت مسار صحي - هندسة وحاسب - اداري
لو دخلت سنة تحضيرية صحية ثم ابغى ادخل كيمياء طبية هل حألقى ؟
والمواد العلمية ضمن أي مسار ؟







رد مع اقتباس
إضافة رد

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع



الساعة الآن 09:00 PM

mobile:0538466159 للإعلان في الموقع واتس : aboyzed_rhotmail.com
مايطرح في المنتدى لايعبر عن رأي الإدارة وإنما رأي الكاتب

  

عالم الواتساب


Powered by vBulletin® Version 3.8.11
Copyright ©2000 - 2019, vBulletin Solutions Inc.
التصميم بواسطة : سعودي لاير ©