منتديات يزيد التعليمية


عذراً سياسة المنتدى تمنع وضع الموسيقى ووضع الصور النسائية في التواقيع والمواضيع والصور الرمزية والشخصية


العودة   منتديات يزيد التعليمية > منتديات قياس ( qeyas ) > ما بعد اختبار القدرات العامة والتحصيلي > المسارات التحضيرية

إضافة رد
 
أدوات الموضوع انواع عرض الموضوع
قديم 09-04-2016, 11:14 PM   رقم المشاركة : 1
خيوط امل
عضو منا وفينا






الحالة
خيوط امل غير متواجد حالياً

 
خيوط امل


 

1 تجربتي في السنه التحضيريه الصحيه بجامعة حائل




السلام عليكم ورحمة الله و بركاته

اول شي ابارك لكل المقبولين في الجامعة وانتوا ان شاء الله قدها
طبعا منتدى يزيد فادني كثير وانا من محبينه فحبيت اشاركم تجربتي عشان تستفيدوا منها ان شاء الله زي ما افادوني تجارب الاعضاء السابقين .
يله بسم الله نبدي .
المسار الصحي بجامعة حائل :
الكليات التابعة للمسار الصحي:
كلية الطب البشري
كلية طب الاسنان
كلية الصيدلة
كلية العلوم الطبية التطبيقية ( اشعة , مختبرات , تغذية , العلاج طبيعي )
كلية التمريض
كلية الصحة العامة ( تخصص الصحة العامة والإدارة الصحية للطلاب , معلوماتية الصحية للطلاب و الطالبات ) .

وبكذا خلصنا التخصصات المتاحة وراح ابدأ اتكلم عن تجربتي وآرائي فيها ممكن تصيب و ممكن تخطأ وادعوا الله ان تسنفيدوا منها

نبدا بإختبار تحديد المستوى عباره عن اربع ورقات كلها اختياري مدتة ساعة واحده وبعد الاختبار راح يقسموكم على 3 مستويات الاول و الثاني والثالث و اعلى مستوى ممكن تبدي منه الثالث لانه هو والمستوى الرابع الازم الكل يأخذهم عشانهم إنجليزي مدموجه مع معلومات صحيه عكس المستويين الاول و الثاني وطبعا قبل الاختبار بكون فيه كلمة وكيلة عمادة القبول و التسجيل يعرفوكم فيها على الجامعة وانظمتها
نجي لنقطة الخلاف هل الأفضل ابدا من المستوى الأول او اتجاوز في المستويات راح اتكلم عن دي النقطة بالإجابيات و السلبيات وفي النهاية تعتمد على قدرات الشخص ومدى تحمله
الإيجابيات :
(( مقولة اذا بديت من المستوى الأول يرتفع المعدل ))
المقوله صحيحه نوعا ما خاصة اذا جبت في المستوى a+ طيب ليش لان كذا راح يصير معاك ساعات اكثر انجليزي بحيث لو ماجبت درجات كويسه في المستوى الي بعده معدلك ماراح ينزل لان المستوى الاول (اذا جبت فيه a+) راح يرفعك تخيل معاي احنا نأخذ مستويين انجليزي كل ترم وانت بديت من الأول وخلصته بدرجة a+ و بديت بالمستوى الثاني وجبت فيه b+ معدلك في الانجلزي كاكل كأنك جايب a
سلبياته :
المستوى بكون جدا سهل للي مستواهم متوسط بحث ممكن يحسوا انه ضياع للوقت وراح تنضغط نهاية السنه لان بعدك ما بتكون مخلص الانجليزي .
المستوى الثاني
الإيجابيات :

بالنسبة لي هذا افضل مستوى تبدأ منه واغلب الجامعة راح تلاقيهم في هذا المستوى لان المستوى الاول بكون مره سهل عليك بس هذا المستوى راح تتدربوا فيه على اساسيات الكتابه ومره راح تنفعكم في المستويات الجايه وممكن تجيب فيه درجات حلوه ترفع معدلك + انك نهاية السنه بتكون مخلص الانجليزي ومرتاح كيف طيب
زي ما قلت كل ترم راح تاخذ مستتويين مثلا بديت من الثاني وتجاوزت الاول
جدولك يصير الترم الأول: انجليزي المستوى الثاني وثالث و الترم الثاني المستوى الرابع تخلصه ويصير نصف الترم الثاني فاضي من انجليزي وتركز في على المواد الثانيه .
سلبياته :
السلبية الوحيده ممكن الي مستواهم مرتفع راح يحسوا انه هذا المستوى تضييع وقت بس حتى الي مستواه مرتفع ممكن يستغله ويجيب فيه a+ عشان يضل معدلك مرتفع لو سمح الله نزلت في ماده
المستوى الثالث :
الإيجابيات :
اعلى مستوى ممكن تبدا فيه هو المستوى الي بديت منه و نوعا ما ندمت لان كنت توني جاية ومااعرف انظمة الجامعة و الاختبارات كيف وطريقة المذاكره وضغط المواد الثانية صار المستوى هذا مثل فأر التجارب بالنسبه لي وما جبت الدرجه الي ابغاها مع انه كان سهل ماهو بديك الصعوبه جبت فيه b+ اجابياته انك راح تدرسه هو والرابع في الترم الاول و الترم الثاني راح تكون مخلص الانجليزي و بكذا تقدر تركز في المواد الثانيه عدل و جدولك راح يكون مره خفيف .
السلبيات :
راح تقل ساعات الانجليزي عندكم فلازم تجيبوا فيه درجات كويسه هو والرابع ويكون معدلكم الترم الاول بشكل عام مرتفع لان الترم الثاني راح تقل الساعات في المعدل لانك مخلص الانجليزي فإذانزل معدلك في الترم الاول صعب ترفعه الترم الثاني .
بصفه عامه راح تأخد الانجليزي 4 ساعات في اليوم ساعتين صباح وبالمساء ساعتين بعد تختلف باإختلاف جدولك وكل مستوى علية 3 ساعات بالمعدل و اي مستوى تجتازه ما راح تأخذ فيه a+ يعني ما بيأثر في معدلك لا بيرتفع ولا بينزل بتطلع لكم رمز NP متجاوز بدرجة النجاح فقط وراح تعرفوا انتوا بأي مستوى لما تنزل جداولكم قبل الدومات بيوم .
طبيعة الأسئلة في صل في اختار في اكمل في رايتنغ في ريدينغ في سبيكينغ (عكس المواد الثانية راح تكون شوز فقط)
راح يكون عندكم مجموعه من الكلمات تحفظوها و تتملوها كل اسبوع في عندكم اختبارين بروغرس تيست (كأنهم كوزات ) وميد تيرم وفاينل لازم تقروا السؤال كامل لان بعض اكملي مثلا هم يبغوك تكملي بكلمة بس انت تقرا البداية وتكتب كلمتين وتالي تتفاجأ ان اجابتك مو حاسبينها مع انها صح وانتبهوا مافي زي المدارس يبغى حاجة وحده تكتب حاجة وحده مو تتفلسف وتكتب كذا حاجة راح تنحذف الاجابة حتى لو كانت صحيحه وانتبهوا لتفاصيل الكابيتل لتر في البداية وبعد كل نقطه و المسافه الصغيره بداية كل بلغراف .

طبعا راح يوزعونكم على مجموعتين تالي بتتبادلوا الترم الثاني وهم :
مجموعة ( كيمياء العملي و النظري , المديكال فاونديشن , الإنجليزي , العربي , ومهارات الاتصال )
المجموعة الثانية ( احياء عملي و نظري , فيزياء عملي ونظري , حاسب الي , انجليزي , إسلامي) هذي المجموعة اصعب من الاولى بحكم وجود مادة الاحياء الدسمه .
الكيمياء :
3 ساعات بالمعدل + كويز كل اسبوع يتحدد مع الدكتوره + ميد ترم من 20 درجة ( حاول تجيب الدرجة الكامل لان الاختبار مكون من جزئية قصيره فحرام تضيعها النصحية هذي لكل المواد مو بس الكيمياء ) + فاينل نظري و عملي اذا جبت في الميد درجة كامله حتى لو نقصت في كم سؤال ما راح تضيع عليك a+
راح ينقسم النظري فيها الي كيمياء عامة بتختبروا ميد ترم وتالي بتبدوا بالكيمياء العضوية و كانت ساعتين بالاسبوع
مع اني ما أميل للكيمياء بس كانت ماده جمييله جداا في العامه بتدرسوا (الماده وطبيعتها التفاعلات الكيميائيه والتفاعلات الفيز ايضا الخصائص الكيميائيه والخصائص الفيزيائيه العناصر الذائبية المولالية المولارية الجدول الدوري القاعده و الحمض ) نفس الثانوي والميد ترم مره سهل
اما الكيمياء العضوية ( صيغ المركبات العضوية الإلكينات و الإلكانات و الكحولات الايثرات... الخ ) تحتاج منك جهد اكثر +فهم وحفظ ومذاكره اول بأول عشان لا تنحاس في الاخير
الكيمياء العملي ساعتين في الاسبوع الساعتين ورى بعض
عباره عن 10 تجارب بعد كل تجربة تكتب تقرير وتسلمه ي نفس المحاضرة او الاسبوع الي بعده ( التسليم على حسب الدكتورة ) ضروري يكون عندك المانيول واللاب كوت والاختبار العملي مره سهل ما تشيل همه .
الفيزياء :
3 ساعات بالمعدل كويز كل اسبوع يتحدد مع الدكتوره + ميد ترم من 20 درجة + فاينل عملي و نظري .
الفيزياء النظرية 6 شوابتر بتكون فيزياء طبية يعني مثلا راح (نأخد العزم بشكل عام تالي جزئية كيف يكون على مفصل الفك , القدم ..الخ مواضيعها الضغط , الصوت , حركة الموائع أو السوائل، العدسات , الكهربائية ... الخ ) كل شابتر وراه اسئلة حاول تحل منهم قد ما تستطيع عشان تتعرف على صيغة الاسئلة
الفيزياء يحتاج فهم ثم فهم افهم بشكل عمييق نهائيا لا تحفظ ا لانك لو حفظت ما بتحل وذاكر اول بأول عشان لو فقره ما فهمتها تروح تسأل الدكتور عنها
الفيزياء من أكثر المواد الي تعبت عليها و انصدم اني انقص في الاخير مع اني احبها وبتلاقي واجد ناس مثلك لأن المسائل تحتاج تحلها بتفكير وتقرأ السؤال صح ولا تتسرع لانهم دايما يحطوا في المسائل خدع ما ينتبه عليها الا الفاهم صح واذا مره نقصت في سؤال في كويز نقاش الدكتور عليه ولاتستحي او تستهين بقدراتك بعض الاحيان تطلع انت صح والسؤال ينحل بكذا طريقة (ترى قد صارت مع بعض الطالبات )
بالنسبة للعملي : نفس شي 10 تجارب اذا الدكتوره سوت التجربه لازم تكوني جنبها و منتبهه ويش قاعده تسوي واي سؤال على طول سأليها وقت تسوية التجارب
راح يكون كل كذا بنت على جهاز ولازم توزعوا الشغل بينكم لا ثم لا تعتمدوا على وحده تشتغل و باقي يتفرج او وحده بس هي تمسك والتجربه وماتشاركم العمل في النهاية هي بتطلع فاهمه وانت ممكن تفهميها بس مؤقت لان ما اشتغلتي بيدك وعرفتي كيف تشغلي الجهاز وكذا ما بيجي الفاينل الا انت نسيتي كل شي وما بتعرفي تحلي و ديك البنت بتعرف تحل .
لا تتكلي على احد واذا في وقت حاولي تعيدي التجربة بلحالك عشان تركز المعلومات اكثر و الريبورت بيعتمد على التجربه الي عملتيها و المقاييس حقتك اذا كانت صح بيطلع عندك الريبورت صح وفي رسم وقوانين كلها تعتمد على عمل التجربه وغلط تنقلوا تجارب بعضكم البعض لان بكذا ماراح تفهمي والنهائي مااحد راح يحل عن احد كل شخص بحاله وفي اختبار الفاينل يعتمد بشكل اساسي على انتباهك في الكلاس انا اعتبر هو العملي الوحيد الي راح تتعب عليه وقت الكلاس عكس عملي الكمياء و الاحياء تقدر تذاكره من نفسك .
الأحياء :
ممكن تكون اكثر ماده دسمه وتحتاج منك حفظ أول باول نفس الشي 3 ساعات بالمعدل كويز كل اسبوع يتحدد مع الدكتوره + ميد ترم من 20 درجة + فاينل عملي و نظري .
النظري بكون عن ( الخلية وخصائصها انقسامها , الهرمونات الموجوده في الاجهزه , اجهزة الجسم الهضمي و العصبي و العضلي ... الخ )
هذه الماده بالذات تحتاج تحفظ وتذاكر اول بأول اذا اجلت و تراكمت عليك الله يعينك ويستر عليك ما بتقدر تخلصها وتلاقي طلاب في الفاينل لاغلب يجي وهو مو مخلص الماده بس لو انت من الي يذاكر على طول حتى لو ماخلصت في الفاينل اقلها عندك فكره عنها عكس الي يأجل ويفتحها مره وحده ماراح يخص وفوقها عادي يصير شابتر كامل مايدري عن ايش هو يتكلم .
العملي فيها احلى فقره تحس نفسك طالب مسار صحي ممتعة جدا راح تأخدوا 10 تجارب بعد فيها الهيكل العظمي والدماغ و أقسامه , فصائل الدم , انقسام الخلية و .. الخ , وراح تشرحوا ارنوب من احلى تجارب عندي
وصح لازم يكون معاك الاب كوت و الاختبار العملي سهل مثل الكيمياء .
المديكال فاونديشن :
ساعتين في المعدل هالمادة تعتبر مدخل او مبدأ للكليات الصحيه في بعض الشوابتر تحس مالها علاقه مع الي قبلها مو مهم تفهم فيها تعتمد على الحفظ بشكل شبه كامل بتاخد منك مجهوود بس في النهاية اذا حفظتها صح راح تجيب فيها A+ الشابتر الي تقول لك الدكتوره مهم تحفظيه نفس اسمك لان مئه بالمئه راح يجي منه ممكن تحصل ملزمه مترجمه عادي تأخذها بس بشرط ما تعتمد عليها ترجم انت بنفسك كل ما ترجمت بنفسك كلما رسخت المعلومه بمخك استخدم الملزمه المترجمه لما ما يكون معاك وقت وحاول تدور تجميعات لها لان الاسئله راح يجي كمية كبيره من التجميعات ولا يحطمك احد ويقول لك مااحد يجيب فيها درجات وصعبة بالجد و الاجتهاد وتوفيق من الله تقدر تجيب a+ وانا الحمد لله جبتها .
مهارات الاتصال :
ساعتين في المعدل تتكلم عن ( مفهوم الذات وانواع الذات و لغة الجسد والتعامل مع الآخـرين و فرق العمل وانواع الذكاء ..الخ )
اختبرنا فيها كوزين و كان فيه برزنتيشن تقيمك الدكتوره على طريقة شرحك و لغة الجسد حق وتفاعلك مع الطالبات و ثقتك بنفسك . مافيها ميد ترم بس فاينل
نوعية الاختبار مواقف و انت تذكر هذا الموقف يدل على ايش وفيها تعارف و انت تختار هذا تعريف ايش .
هذه الماده تعتبر ماده لرفع المعدل بس الاغلب يجيب فيها b+ بس مو معناتها انك ما تقدر تجيب الدرجه الكامله تقدر بس انتبه من المحطمين هذه الماده و المديكال فاونديشن من اكثر المواد الي ممكن يحطموك فيها ومن وجهة نظري اسباب الي تخلي الطلاب ينزلوا في هذه الماده ثلاثة اسباب : لان الملزمه تفتقر للمواقف وهذي اساس الاختبار بس تعداد وتعريفات مسروده بدون شرح , مافيها اختبار ميد ترم عشان تتعرف على كيفية الاسئلة وتكون اوردي مذاكر نصف الملزمه فتنصدم في الفاينل بطريقة الاسئلة وكمية المذاكره و الاشياء تشبه بعضها البعض ممكن تتلخبط ويصير معاك لبس وفي الاخير يعتمد عليك انت كيف تفهم الموقف وعلى اساسه بتحل فناس تفهم الموقف من زاوية غير الزاوية الي يبغاها الدكتور وعشان تتجنب هذي الاسباب في وقت المحاضره اذا الدكتور شرح شي جديد وخاصة لما يكون متشابه اطلب منهم يذكر لكم مواقف على هذه الفقره لتجنب اللبس ومنها ترسخ المعلومه هذه الحركه مره فادتني وترى المواقف الي تطلب من الدكتور يذكرها تتكرر بصيغة مقاربه لها في امتحان الفاينل .
اقرا المحاضره الي قبل اي فقره ما فهمتها اسأل عنها الدكتور في بداية المحاضره وخليه يضرب لك موقف عليها وناقشوا الدكتور عن الفقرات المتشابه بإذن الله مع قراءة المحاضره الي قبل ومع تفاعل مع الدكتور و سؤاله ان يضرب لكم مواقف راح تصير الماده اسهل وتجيب فيها a+
العربي :
3 ساعات في المعدل لاتقول سهل وتسحب عليها ترى من المواد الثقيله الي تأثر في المعدل لا يصيبك الغرور
اختبرنا فيها كويز وفيها بحث وفيها ميد تيرم وفاينل
تتكلم عن (الهمزات قطع ووصل و همزه في اخر الكلمة وسط الكلمه و التلخيص ..الخ )
الماده سهله وفرصه لرفع المعدل الأسئله الي تجي في الاختبار بعضها دقيق فإنتبه وانت تحل في الميد ترم حقنا جابوا لنا كم سؤال من برى المنهج <كان الميد جلطة جماعية > بس الحمد لله في الفاينل ما عادوا الحركه
بعد كل درس امثله كثيره حاولوا تتدربوا عليها كلها العربي حرام ما تجيب فيها A+او A وبس
الإسلامي :
ساعتين في المعدل اختبرنا كويز وفي بحث و ميد تيرم و فاينل
ماده مواضيعها جديده عن الي موجوده في المدرسه ما عدى الجزئية الاخيره فيها تشابه خفيف
تتكلم عن (الثقافه الإسلاميه واهدافها المخاطر الي تواجهها و تالي بتتكلم عن اركان الايمان بالتفصيل ...الخ )
لما تجي تذاكرها ذاكرها بتركيز ولا تسحب على شي لان كل شي ممكن يجي فيها ودايما يجي الكلام مابين السطور اوسالفة في صحيح وفي اصح .
حاول تدور تجميعات للماده هذي لان الاسئلة تتكرر وحتى اسئلة الميد ترم راح تشوف جزئية كبيره منها مكرره في الفاينل وان شاء الله A+
مادة الحاسب الالي :
ماده سهله ساعتين في المعدل وفرصه عشان ترفعه فيها كذا كويز مااذكر بالضبط و ميد تيرم وفاينل
تنقسم لجزئيين عملي و نظري
النظري فيها اغلبه في اول شابترين تقريبا وهي الي تحتاج تحفظها مثل (مقدمه ومكونات الحساب وانواعه و الفيروسات و المدخلات و المخرجات في الحاسب ..الخ ) وبقية الشوابتر النظري فيها اقل و الغالب فيها العملي وهو اسهل مثل وورد الأكسل ... اهم شي تطبق مع الدكتوره وتفهم من وين تطلع هذا وكيف تسوي هذا وتدخل على هذا .
وبكذا خلصنا المواد
بعض النقاط المهمه :
الحضور عليه 5 درجات لا تتهاون فيه درجات ببلاش لا تضيعها
قدرات تختلف عن قدرات غير لا تتحطم انك تشوف ناس مخلصين قبلك وتسحب على الماده وتندم بعدين
ابتعد قدر الإمكان عن الناس السلبيه لأن مع الوقت راح تصير سلبي مثلهم
ركز وانت تقرأ السؤال واقرأ الاجابات بعد يما درجات راحت عليي لان اقرأ بداية السؤال واقول سهل و لا اشوف نهايته ويصير طالب شي ثاني ( خاصة في الانجليزي )
توكل على الله وادعي لنفسك بالتوفيق
مهما انضغطت تذكر انه هذي السنه هي الي راح تحدد مستقبلك طول حياتك لا تتهاون فيها
المذاكره اول بأول اذا ما قدرت اقلها اقرأ المحاضرات الطايفه
هذا الموقع ممتاز عشان تحسب فيه معدلك ومتوافق مع جامعتنا ( معلومة معدلاتنا من 4 )

http://www.qu.edu.sa/gpa.aspx

هذه معايير التخصيص في الجامعة وسعة القبول تختلف من سنه لأخرى
http://www.uoh.edu.sa/MediaCenter/Ad...hsees2016.aspx
عشان يفتح لك الصيدلة و الطب البشري و الاسنان لازم 3 فوق
بس مو معناته انك اذا جبت هذه النسب تنقبل على حسب قوة دفعتك و مدى الإزدحام على التخصص
اقلها خلي معدلك من 3.5 وفوق والافضل ترفعه اكثر من كذا .

معلومات جانبية :
يوجد سكن للطالبات في الجامعة والي ما ترتاح ونسبة كبيره من طالبات كذا في شقق مفروشه واجد تسكن طالبات مع بعض .
في نهاية أتمنى استفدتوا من الموضوع وعذرا اذا فيه أخطاء املائية او مره أتكلم بصيغة مذكر مره مؤنث لان كتبته بسرعة
دعواتكم لي بالتوفيق .








رد مع اقتباس
قديم 09-05-2016, 08:21 PM   رقم المشاركة : 2
وليد آل فقيه
مشرف التعليم الجامعي - التعليم العالي
 
الصورة الرمزية وليد آل فقيه






الحالة
وليد آل فقيه غير متواجد حالياً

 
وليد آل فقيه عضو مبدع لامحالةوليد آل فقيه عضو مبدع لامحالةوليد آل فقيه عضو مبدع لامحالةوليد آل فقيه عضو مبدع لامحالةوليد آل فقيه عضو مبدع لامحالةوليد آل فقيه عضو مبدع لامحالةوليد آل فقيه عضو مبدع لامحالةوليد آل فقيه عضو مبدع لامحالةوليد آل فقيه عضو مبدع لامحالةوليد آل فقيه عضو مبدع لامحالةوليد آل فقيه عضو مبدع لامحالة


 

رد: تجربتي في السنه التحضيريه الصحيه بجامعة حائل




تم التثبيت مع كامل الامتنان للأخت المبدعة..







التوقيع :
تَوَفَّنِي مُسْلِمًا وَأَلْحِقْنِي بِالصَّالِحِينَ

رد مع اقتباس
إضافة رد

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع



الساعة الآن 02:12 AM

mobile:0538466159 للإعلان في الموقع واتس : aboyzed_rhotmail.com
مايطرح في المنتدى لايعبر عن رأي الإدارة وإنما رأي الكاتب

  

عالم الواتساب


Powered by vBulletin® Version 3.8.11
Copyright ©2000 - 2019, vBulletin Solutions Inc.
التصميم بواسطة : سعودي لاير ©