السلام عليكم ورحمة الله وبركاته
بسم الله الرحمن الرحيم
مقدمة
ابارك لكم دفعة 437 قبولكم في جامعة الملك سعود هذا الصرح التعليمي العظيم ..
من منطلق حديث النبي صلى الله عليه وسلم {أحب الناس الى الله انفعهم للناس}..
أنقل لكم تجربتي البسيطة
للسنة التحضيرية في جامعة الملك سعود للمسار الصحي للعام 1436 - 1437 آملاً من الله تعالى ان تنفعكم ولو بشيءٍ يسير ..
.
.
.
بالبداية عشان يكون الموضوع مرتب وما اطوّل عليكم ب اكتب النقاط الاساسية للموضوع وتسذا 
التقديم
المقابلة الشخصية
اليوم التعريفي
وصف + موقع المباني
المواد الدراسية + وصف المادة + تقسيم الدرجات + مصادر المذاكرة
نصائح + خاتمة
.
.
.

التقديم :
طبعا فيه نوعين من التقديم
1: تقديم إلكتروني :
عن طريق بوابة القبول الموحد لجامعات الرياض وهذا رابطهم
طلاب :
https://www.rbu-admit.edu.sa
طالبات :
https://www.rgu-admit.edu.sa/
.
.
2: تقديم يدوي :
في حال تم رفضك في بوابة القبول الموحد يكون لك فرصة تقديم يدوي تروح لعمادة القبول والتسجيل وتستفسر عن بدايته وبيخلونك تقدم على كمبيوتر يعني ما يحتاج تجيب معك أي وثائق ومن ثم الانتظار لحين الفرز ثم اعلان النتائج والمقابلة الشخصية ..
..
..
..

المقابلة الشخصية :
بيعطونك موعد للمقابلة الشخصية اهم شيء تروح لهم بثوب وشماغ متكشخ يعني 
وراح يسألونك عدة اسئلة بسيطة مثل
ليش داخل مسار صحي؟
(بيشوفون هل انت داخل برغبتك ام برغبة اهلك)
هل سبق لك عملت مع فريق عمل تطوعي؟
وممكن يستفزك واحد منهم لكن خلك واثق وهادي وجاوب على قد السؤال (لا تتفلسف)
ونادراً يرفضون احد في المقابلة الشخصية ..
..
..
..

الاسبوع التعريفي :
يكون غالباً في الاسبوع الاول يتكون من محاضرة تعريفية وكلمة للعميد مع اصدار البطاقات الجامعية وبطاقات الصراف الآلي واستلام الكتب الدراسية واختبار تحديد المستوى (على دفعتنا) لكن أقرت السنة التحضيرية لدفعتكم ان اختبار تحديد المستوى بيكون إلكتروني من الفترة 4 – 22 من شهر 11 يعني بتختبرون في بيتكم ما يحتاج تجون الجامعة 
وهذا الرابط للاختبار
https://t.co/RHN24jFCzm

..
..
..

وصف + موقع المباني :
الفصل الاول راح تدرسون بالسنة التحضيرية فقط وهذا موقعها
https://t.co/9PBgPNoXWR
المبنى جميل جداً ومكيف كأنه مول مو سنة تحضيرية 
مقسم لثلاث مسارات صحي وعلمي وانساني
ومكون من كلاسات طبعاً ومطاعم وكوفي شوب وصالة طعام ومكتبة ومحل جوالات ومواقف ادوار ..
اما الفصل الثاني وما ادراك ما الفصل الثاني 
بتتبرأ منكم السنة التحضيرية .. امزح 
بتدرسون اللغة الانجليزية فقط في مبنى السنة التحضيرية اما باقي المواد في كلية العلوم وهذا موقعها
https://t.co/StYhmELfh7
المبنى جيد بشكل عام لكن ما يقارن بمبنى السنة التحضيرية .. 

اذكر كنا في محاضرة بهالكلية فجأة مجموعة عمال يدفون لهم عربة فوقها حديد يمشون بالسيب اللي بين الفصول ولا معبرين بأحد 
وصوتها كان مزعج جداً ..
بس بشكل عام الفصول ملائمة للدراسة ..
..
..
..


الفصل الدراسي الأول :
من اسهل الفصول اللي راح تمر عليكم في حياتكم الجامعية ما ابي ابالغ لكن ممكن اسهل من الثانوي! وهذا ما يعني انك تتساهل في هذا الفصل وما تعطيه حقه ..
بتدرسون بإذن الله 4 مواد في هذا الفصل لغة انجليزية ورياضيات وحاسب آلي ومهارات اتصال
اللغة الانجليزية : نجم 141/142/143
عدد الساعات في المعدل : 8 ساعات
يعني تلعب في المعدل لعب لازم تضمن فيها أ+
راح يقسمونكم بعد اختبار تحديد المستوى 3 مستويات
A : يعني مبتدئ يدرسون 4 ساعات يومياً بمعدل 20 ساعة في الاسبوع
B : يعني متوسط يدرسون 3 ساعات يومياً بمعدل 15 ساعة في الاسبوع
C : يعني متقدم يدرسون ساعتين يوميا عدا يوم اوف بمعدل 8 ساعات في الاسبوع
تقسيم الدرجات : 30 شهري + 30 نهائي + 20 مشاريع + 10 اختبار كتابة + 10 اختبار محادثة = 100 درجة
طريقة الاختبار الشهري والنهائي = اختيار من متعدد
الاختبار الشهري والنهائي بيكون محوسب يعني راح تختبرون عن طريق الكمبيوتر في الجامعة ..
مصادر المذاكرة : كل مستوى راح يدرس كتاب معين لكن راح يرسلون لكم ملف قبل كل اختبار تذاكرونه يتضمن المفردات والقواعد هي اللي ما راح يطلع منها الاختبار اما الاستماع والقراءة تجي من برا يعني تدربوا من البداية عليها حط لك وقت اسبوعياً تدخل بعض المواقع وتتدرب وتحسن مهارتك ..
وهذي بعض المواقع المفيدة وغيرها كثير ..
http://www.esl-lab.com/
http://ar.talkenglish.com/listening/listen.aspx
وهذا موقع من اشراف قسم اللغة الانجليزية بالجامعة لجميع المهارات وفيه فيديوهات مفيدة , بيعطونكم كلمة المرور في بداية العام الدراسي ان شاء الله عشان تكون لكم صلاحية كاملة لاستخدامه
https://epy.ksu.edu.sa/ELSDOnline/
المشاريع بسيطة جدا وتقدر تضمنها بالراحة كلها مشاريع كتابة يعني مجرد انك تكون بالفصل وتطبق اللي يقوله لك الاستاذ راح تضمن الدرجة الكاملة بإذن الله ..
اما بالنسبة للمحادثة حاول تسولف كثير مع استاذك لانها تحسن من مهارة المحادثة وتكسبك ثقة في نفسك وأيضاً اكتبوا تعبير عن أي شيء وخلو الاستاذ يصححه لك ويقولك اخطائك مفيدة جداً هالطريقة ..
وأعضاء هيئة التدريس اغلبهم اجانب اللي من امريكا وبريطانيا وجنوب افريقيا ووووإلخ يعني فرصة تتعلم من اصحاب اللغة الاصلية وكذا ..
اذا فيه قاعدة ما فهمتها عندك اليوتيوب حط عنوان القاعدة وبتطلع لك ملايين المقاطع ..
اذا معك شهادة اختبار ايلتس جبت فيها 5 او اعلى لك حق يشيلون عنك الاختبار النهائي ويعطونك درجته للفصل الاول فقط 
..
..

الرياضيات : ريض 140
عدد الساعات في المعدل : ساعتين
بتدرسونها 3 ساعات اسبوعياً
تقسيم الدرجات : 30 شهري + 10 اختبارات قصيرة وانشطة + 10 واجبات منزلية + 50 اختبار نهائي = 100 درجة
طريقة الاختبارات = تحريري
مادة زي الثانوي لكن اللهم انها باللغة الانجليزية بتاخذون فيها المعادلات الخطية والفترات والدوال العكسية واللوغاريتمات وغيرها ..
هذي الخطة الدراسية تبع دفعتا ..
http://py.ksu.edu.sa/male/sites/py.k...0student_0.pdf
مصادر المذاكرة : راح تشترون الكتاب بداية الترم من التحضيرية وتتدربون عليه وانصحكم بالاسئلة السابقة تدربوا عليها من البداية تحصلونها في مكتبة كوبي كوم ومكتبة المهندس مقابل مبنى السنة التحضيرية ..
اذكر كان عندنا دكتور الله يجزاه خير يكتب على السبورة كل درس وشرحه عسل ويقول اكتبوا معي في دفتر ولا ترجعون للكتاب الا للواجبات المنزلية والتدرب عالاسئلة ومتساعد جداً يعني كل دكتور وطريقته , واذا فيه شيء استصعب عليكم في واحد اسمه نضال الطلاع يشرح المنهج بفيديوهات بشكل مرتب وجميل وهذه جميع فيديوهاته لجميع فصول المنهج ..
https://drive.google.com/folderview?...Ek&usp=sharing
..
..
الحاسب الآلي : تقن 140
عدد الساعات في المعدل : 3 ساعات
بتدرسون 6 ساعات في الاسبوع كل محاضرة ساعتين
لغة التدريس والمنهج هي اللغة الانجليزية
تقسيم الدرجات : 30 شهري + 50 نهائي + 10 التقييم المستمر + 10 مشروع
طريقة الاختبارات = اختيار من متعدد + صح وخطأ
مصادر المذاكرة : الكتاب + ERA + الاسئلة السابقة
مادة دسمة شوي يبيلها ترجمة من البداية للكلمات الصعبة
والمنهج عبارة عن 6 فصول الحاسب ومكوناته , نظام التشغيل windows 7 , Word , Excel , Powerpoint , واخيراً الانترنت ..
الاختبار الشهري والنهائي بيكون محوسب يعني راح تختبرون عن طريق الكمبيوتر في الجامعة
الاختبار الشهري بتختبرون في اول فصلين ثم تنسونهم ما ترجعون لهم
يبقى 4 فصول بتختبرون فيها بالاختبار النهائي ..
ايش هو ERA ؟
موقع للتدريب على المنهج وإجراء اختبارات تجريبية مشابهة للاختبار واجراء التقييم المستمر Take a Challenge
هذا الموقع
http://era.py.ksu.edu.sa/pyboys/index.aspx

اسم المستخدم : الرقم الجامعي
كلمة المرور : السجل المدني
..
..

مهارات الاتصال : علم 140
عدد الساعات في المعدل : ساعتين
بتكون 3 ساعات في الاسبوع مقسمة على محاضرتين وحدة ساعتين والثانية ساعة
تقسيم الدرجات : 25 مشاريع + 15 المشاركة الفصلية + 20 الاختبار الشهري + 40 الاختبار النهائي = 100 درجة
طريقة الاختبارات = اختيار من متعدد + صح وخطأ
مصادر المذاكرة : الكتاب + حل اسئلة سابقة واسئلة الحقيبة التفاعلية
المادة ممتعة وسهلة وكثير جابوا فيها الدرجة الكاملة لكن لا تستهين فيها عطها حقها ..
..
..
..
الفصل الدراسي الثاني :
فصل لا يقارن بالفصل الاول ابداً , يبغى له جد واجتهاد وتنظيم وقت و صبر ..
لازم تنظم وقتك لانه من الاسبوع السابع راح تبدأ اختبار ورا اختبار الى نهاية السنة ..
بتدرسون في هذا الفصل 5 مواد
مادة الانجليزي بتكون في السنة التحضيرية اما الاربع مواد الباقية بتكون في كلية العلوم ..
كلية العلوم كلية على قولتهم ( مشخال ) كلية صعبة للمبزوط سهلة للمجتهد اللي بيتعب من بداية الفصل ..
..
..
اللغة الانجليزية التخصصية : نجم 147/146
نفس المادة في الفصل الاول لكن الفرق انكم بتاخذون في هذا الفصل مصطلحات طبية يرسلونها مع الملف اللي قلت لكم عنه ..
والمشاريع تكون قطع طبية ..
سبق وتكلمت عن تقسيم الدرجات .. ^^
..
..

الفيزياء : فيز 145
عدد الساعات في المعدل : 3 ساعات
بتدرسونها ساعتين في الاسبوع ..
تنقسم الى قسمين :
نظري وعملي
تقسيم الدرجات : 15 شهري اول + 15 شهري ثاني + 30 عملي + 40 نهائي
طريقة الاختبارات = اختيار من متعدد
مصادر المذاكرة للنظري : مذكرة الضياء + حل اسئلة سابقة
وصف المادة : الحركة في خط مستقيم والمتجهات وقوانين نيوتن والشغل والموائع والعدسات والتيار الكهربائي والفوتونات وتختمون المنهج بالفيزياء النووية
هالمادة خصوصاً اعضاء هيئة التدريس سيئين للغاية ..
اذا تشوف نفسك تحتاج مدرس خصوصي عندك الضياء وحنفي
الضياء طريقته في الشرح ممتازة بحيث انه يشرح القوانين ثم يشرح امثلة الكتاب ( المطلوبة) ثم يحل الاسئلة السابقة ..
وعنده سلبيات منها عدم الانضباط بالوقت المحدد
يعني ممكن يأخر الدرس اكثر من مرة وقد تصل الى نص ساعة!!
طريقة مذاكرتي لهالمادة كنت بعد كل محاضرة اذاكر قوانين الدرس ثم احفظها وافهم الامثلة ثم ابدا احل اسئلة اختبارات سابقة
بالبداية كنت اجيب دفتر و اكتب السؤال عشان ترسخ المصطلحات الغريبة لكن مع الوقت تعودت وصرت افهم الاسئلة واكتفيت بكتابة المعطيات والمطلوب من السؤال وعلى هالطريقة من بداية الترم
و الحمدلله رأيت ثمرة هذي الطريقة وجبت درجة حلوة بهالمادة ..
القسم العملي :
راح تاخذون عشر تجارب مقسمة على عشرة اسابيع ..
لا تسوفون في كتابة التقارير خلصوها اول بأول عشان ترتاحون وما تنضغطون ..
الوقت لا يحتمل التسويف ..
مصدر المذاكرة للاختبار هي التقارير اللي بتكتبونها يعني بلاش طلاسم وشغل مش حالك .. 
تقسيم الدرجات 15 درجة على التحضير وكتابة التقارير و 15 درجة على الاختبار النهائي ..
..
الاحياء : حين 145
عدد الساعات في المعدل : 3 ساعات
راح تدرسونها ساعتين في الاسبوع
تقسيم الدرجات : 15 شهري اول + 15 شهري ثاني + 30 عملي + 40 نهائي = 100 درجة
طبعاً فيها جزء نظري وجزء عملي
مصدر المذاكرة للنظري : السلايدات + اختبارات سابقة
وصف المادة : المنهج عبارة عن 26 محاضرة
محاضرتين عن الجزيئات الكبيرة اللي هي الكربوهيدرات والبروتينات والدهون ثم محاضرة عن الفيروسات ثم 5 محاضرات عن الخلية وانواعها وعضياتها ثم محاضرتين عن النقل في الخلية ثم محاضرتين عن الانزيمات و 3 محاضرات عن التنفس الخلوي ومحاضرتين عن الانقسام الخلوي ثم 3 محاضرات عن ال DNA تكوينه ونسخه وترجمته ثم محاضرة عن تصنيع البروتين ثم 3 محاضرات عن الوراثة وتختمون المنهج بمحاضرتين عن الغدد الصماء وهرموناتها 
المادة ممتعة وتحسسك انك طالب مسار صحي بالفعل ..
دكاترة هالمادة خاصة هم افضل دكاترة مروا علي (وجهة نظر) ..
شرحهم جميل واختباراتهم واضحة
واذا فيه محاضرة ما فهمتها فيه فيديوهات بينزلوها لكم على البلاكبورد
يشرحها دكتور عملاق اسمه اشرف .. يبسط لك المحاضرة (ويفصفصها حبة حبة)

ذاكر المحاضرات اول بأول ولا تراكمها عليك لان ارجع واقول
الوقت لا يحتمل التسويف ..
اما بالنسبة للجزء العملي :
عليه 30 درجة من المادة وكل دكتور وتقسيمه
تقسيم دكتورنا كان 10 درجات مشاركة وواجبات و 10 اختبار شهري و 10 اختبار نهائي ..
ينقسم الى جزئين :
الجزء الاول بيكون عبارة عن شرائح بالمجهر كل اسبوع تاخذون عدة شرائح ثم تختبرون اختبار نصفي
صوروا الشرائح اول بأول واكتبوا اسم الشريحة على الصورة لان هي مصدر مذاكرتكم .. ( كنت اصورها سناب واكتب اسمها )
وبنهاية الاختبار النصفي ينتهي هذا الجزء ..
اما الجزء الثاني وهو تشريح الفأر 
امتع شيء بكلية العلوم ..
بتشرّحون كل اسبوع فأر عشان يجي الاختبار النهائي وانتم متقنين التشريح 
الاختبار العملي النهائي عبارة عن تشريح للفأر + عدة رسمات بيعطيك اياها الدكتور + بيسألك عدة اسئلة عن اعضاء الفأر يعني بيقولك وين البنكرياس والمعدة مثلاً وانت تجاوب عليه ..
..
..
مقدمة غي الكيمياء العضوية : كيم 145
عدد الساعات في المعدل : ساعتين
بتدرسونها ساعتين بالاسبوع ..
تقسيم الدرجات : 30 شهري اول + 30 شهري ثاني + 40 نهائي
وصف المادة : المادة بسيطة تتكلم عن الكيمياء العضوية نفس اللي اخذناه في الثانوي بس باللغة الانجليزية اللي هي ..
الألكانات والألكينات والألكاينات والمركبات الاروماتية والهاليدات العضوية والكحولات والفينولات والايثرات والالدهيدات والكيتونات والاحماض الكربوكسيلية ومشتقاتها واخر شيء الامينات ..
هنا مصادر المذاكرة كثيرة ومنها مذكرة الكناني او مذكرة حسين سليمان هذي اشهر مذكرتين .. مذكرة محمد حسن لا تأخذها الا اذا بتسجل خصوصي عنده لانك ما راح تفهم شيء منها ..
مصادر المذاكرة بالنسبة لي : أوراق الكناني + مذكرة محمد حسن + بنك الاسئلة للكناني وحسين سليمان + اختبارات سابقة
المادة مو صعبة لكن اختبارات القسم بعضها فيها لف ودوران والحل انك تحل اكبر قدر من الاسئلة ..
اذا شفت نفسك في بداية الترم تحتاج مدرس تقدر تستعين بمدرس خصوصي يشرح لك المادة ..
..
..
الاحصاء الحيوي : احص 145
عدد الساعات في المعدل : ساعتين
ساعتين دراسية بالاسبوع
تقسيم الدرجات : 30 شهري أول + 30 شهري ثاني + 40 نهائي
وصف المادة :بتدرسون فيها مقدمة عن الاحصاء الحيوي ما راح تتعمقون فيه وانواع البيانات كمية ونوعية وكذا ومقاييس النزعة المركزية (الوسيط والمنوال والمتوسط) والمدى والانحراف المعياري والتباين والاحتمالات بجميع انواعها ثم الفرضيات وانوعها وغيرها ..
مصادر المذاكرة : مذكرة الشيحة + حل اسئلة سابقة + حل اسئلة سابقة + حل اسئلة سابقة . > للتكرار معنى 
مادة فيها كلام كثير وحشو لكن انت خذ الزبدة من كل درس ..
نصيحة لا تذاكر هالمادة الا وانت مروق ..
كثير قالوا انها مادة بسيطة ومن هالكلام لكن لا تغتر والله اذا ما فهمت المادة زين بتجيب العيد 
اعضاء هيئة التدريس من كل ديرة يعني ممكن يجيك واحد سيء وممكن يجيك بطل ..
..
..
..
نصائح :
توكل على الله في جميع امور حياتك واعلم ان قدرك مكتوب من قبل ان تُخلق فابذل السبب واترك التدبير على المسبب سبحانه ..
بر بوالديك واجعل لك خبيئة دائمة من صدقة او وتر او دعاء ..
حب لأخيك ما تحب لنفسك عندك معلومة يحتاجونها خوياك لا تبخل عليهم وصدقني راح تشوف فائدتها ..
لا تسمع للناس السلبية ولا تعطيهم وجه خصوصا في الفصل الثاني ..
كونك اخذت مدرس خصوصي لا يعني انك ضمنت الدرجة الكاملة فمعظم الجهد عليك ..
رتب وقتك وذاكر اول بأول بتمشي امورك ..
الاغلب متفق ان السنة التحضيرية هي ضغط نفسي مو صعبة على المجتهد ..
ذاكر الاسئلة والاختبارات السابقة لان اما ان يجي سؤال نسخ لصق او تكون الفكرة قد مرت عليك ..
..
..
..
ختاماً اتمنى اني وفقت في هذا الطرح ان اصبت فمن الله وان اخطأت فمن نفسي والشيطان , اتمنى لكم دوام التوفيق والنجاح في حياتكم الجامعية وغيرها ..
اتشرف بالإجابة على استفساراتكم وهذا حسابي في الآسك :
https://t.co/UHR9TFGhXF
تويتر :
https://twitter.com/nsm2014

..
والحمد لله رب العالمين